Enfa ya dokita omukugu mu nsonga z'okuzaala e Zzana erese ebibuuzo mu bantu!

POLIISI etandise okunoonyereza ku nfa ya dokita agambibwa okufiira mu kasenge ka wooteeri e Kitende ku Ssande.

Dr. John Bosco Spire Kiggundu, abadde nannyini ddwaaliro lya Henrob Hospital e Zzana, yasangiddwa mu kasenge ka Dreams Hotel e Kitende gye yabadde apangisizza nga yafudde mu ngeri erese ebibuuzo.

Amyuka omwogezi wa poliisi mu Kampala n’emiriraano, Luke Owoyesigyire yagamabye nti batandise okunoonyereza okuzuula ekyavuddeko okufa kwa Dr. Kiggundu. 

Owoyesigyire yannyonnyodde nti kkamera za wooteeri ziraga nga Dr. Kiggundu yabadde yekka era baalabye ng’ayingira ali yekka wabula ku Ssande kumakya, abakozi baakonkonye nga taggulawo kwe kuyita poliisi.

Dr. Kiggundu abadde yakuguka mu ndwadde z’abakyala era yasoose kulongoosa mulwadde oluvannyuma n’afuna essimu nga bamuyita mu kifo ekimu n’ekyaddiridde kufuna mawulire ga kufa kwe. 

Ssentebe w’ekyalo Kirimanyaga e Zzana, Michael Kayondo yagambye nti yabaddewo nga baggyayo omulambo kyokka omugenzi alinga eyabadde yeerwanako.