Engeri amagye gye gasse eyabadde agenda okutulisa bbomu

ABEEBYOKWERINDA balinnye eggere mu lukwe lw’omukazi agambibwa okuba ow’akabinja k’abayeekera aka Allied Democratic Forces (ADF) gwe bagamba nti yabadde abulako katono okutulisa bbomu mu basuubuzi b’omu katale k’e Kaleerwe.

Omukazi ono eyabadde atambulira ku pikipiki, abaserikale baamukubye amasasi agaamuttiddewo nga tannatulisa bbomu, ate owa bodaboda eyabadde amuvuga n’agibuukako n’adduka kiwalazzima. 

Kulaigye ng'ayogera.

Bino byabaaddewo ku Ssande mu ttuntu ku ssaawa 12:30, ku katale ka Freedom Market ku Kaleerwe.

Dalausi Mukyakaze, omu ku bakulembeze mu katale kano yagambye nti zaabadde mu ssaawa nga 12:30 ez’oku makya, ng’abasuubuzi n’abaguzi bali mu kwetala, kwe kuwulira amasasi agavuga buli omu n’agwa kkava.

Bwe gaasirise, abantu baakung’aanye okulaba ogubadde, nga balowooza nti abaakubiddwa baabadde babbi, era Mukyakaze agamba nti waliwo abavubuka abaabadde bagezaako okubba ensawo omwabadde bbomu nga balowooza nti yabaddemu ssente, era bano poliisi ye yabatangidde.

Abakulu mu byokwerinda abaakulembeddwa omwogezi w’amagye, Felix Kulayigye, amyuka omwogezi wa poliisi mu Kampala n’emiriraano Luke Owoyesigyire, RPC wa Kampala North, Moses Nanoka ne DPC w’e Wandegeya, Hassan Hiwumbire baatuuse mu kifo kino okunoonyereza ne kugenda maaso, era poliisi yawaliriziddwa okukuba amasasi mu bbanga okugumbulula abantu abaabadde batandise okukung’aana.

Maj. Gen. Kulayigye yasinzidde ku kitebe ky’amagye e Mbuya ng’ayogerako eri bannamawulire eggulo ku Ssande n’agamba nti omukazi ono gwe bateebereza okuba munnansi wa DR Congo, baatandika okumulinnya akagere okuva ku Lwokuna lwa wiiki ewedde nga June, 19, 2025 okutuusa bwe baamugudde mu buufu.

Yannyonnyodde nti baamubazizza ng’alinnye bodaboda eyamuggye e Busega ne bamuwondera, olwatuuse ku nkulungo y’oluguudo oludda e Gayaza, baagezezzaako okumuyimiriza n’agaana ekyabawalirizza okumukuba
amasasi agaamusse.

Eyabadde amuvuga kigambibwa nti yabuuse ku piki n’adduka era ng’ebimukwatako tebinnamanyika. Wabula amagye gagamba nti wadde nga basazeewo okunoonya owa bodaboda, okubaako bye bamubuuza, bamativu nti minsoni y’omukazi, yandiba nga teyagitegeddeko.