Poliisi ekutte abasajja 2 abagambibwa okuwamba abagwira ne bakanda ffamire zaabwe ssente

Abantu babiri abagambibwa okuwamba bannansi b'eggwanga lya Pakistan babiri ne basaba ab'enganda zaabwe obukadde 20, poliisi ebakutte.

Bino, bibadde ku kyalo Mabanda mu muluka gwa Piida e Luweero, abazigu bana nga batambulira mu mmotoka nnamba UAM 180R Premio, bwe bawambye Abaasi Ali ne Rashid Ahmed nga bakozi ba Lucky Sajid musingansimbi Omupakistan.

Kigambibwa nti bwe baabawambye okuva e Luweero, baabavuze okutuuka ku Kansagati Matugga Road,  ne batandika okubakanda ssente.

Omwogezi wa poliisi mu Kampala, Patrick Onyango agambye nti Flying squad ng'eri wamu ne poliisi e Matugga basobodde okukwatako babiri, abalala ne badduka era abawambe ne babanunula. Okubuuliriza kuli mu jjiya.