Owa Poliisi afumitiddwa ekifo mu kavuvungano

EYAFUMISE   omusirikale  ekiso  mu lubuto bwe yabadde  agenze  okumukwata ku musango  gw’okugeezaako okutta mukyala we asimbiddwa navunanibwa  oluvannyuma nasindikibwa ku alimanda .

Davis Alinda 30  omutuuze we Katooke Kisimu mu disitulikiti ye Wakiso omusiizi wa langi ku bizimbe yafunye obutakanya ne mukyala we Jackline Nakiwu  okukakana ng’afumise  Dan Ampadde   akulira poliisi ye Katooke Kisimu ekiso mu lubuto nga mu kavuvungano Ampadde yamenyese n’omukono oluvanyuma Alinda yakwatiddwa.

Ensonda  ku poliisi ye Kisimu zaategeezza nti Nakiwu bwe yafunye obutakanya  ne Alinda nga kigambibwa yabadde ategese ekiso okutematema mukyala we Nakiwu yaddukidde ku poliisi  okwekubira enduulu ekyawalirizza Ampadde  okusindiika abasirikale okukwata Alinda ng’ono baamusanze  tasalikako  musale nga yekaliisa  nabaagoba ng’ayagala ku batema ng’era abamu ku basirikale baaddukidde mu kaabuyonjo okutaasa obulamu ng’eno gye baakubiridde mukama waabwe .

Ampadde yasitukiddemu abasirikale bonna badduse nga   Alinda  atabuse natandiika okukuba amasasi  ng’agamu gakutte Alinda mu kugulu ebyembi emmudu yesibye n’etaddamu kukuba masasi  ekyawalirizza Ampadde okudda emabega nagwa mu mwala ng’eno Alinda gye yamusanze namufumita ekiso mu lubuto  namenyeka n’omukono .

Jackline Nakiwu akola ogw’okusiba enviiri  e Katooke  yategeezezza Bukedde ku ssimu nti bamaze  ne bba omwaka gumu n’emyezi esatu ng’amulinamu omwana omu omulenzi ow’emyezi 5  nga yagenda okumufuna yamusanga alinaayo omukazi gwe yazaalamu omwana  ng’ono ye yavuddeko obuzibu ng’eby’okugenda n’omwana mu bwenzi si bituufu

Yagasseko nti  omukazi abadde ajja akubira Alinda amassimu mu matumbi budde ne banyumya kye yayise ekikolwa eky’obujoozi nga bwe yanenenyezza ku Alinda okukomya akamanyiro  kino tekyamumalidde n’akwata omwana nagendanga naye ku mulimu gy’abadde amuweera omukazi gwe yagambye tamumaanyi namuweeka nga bwe yageezezzako okumusaba amuddize omwana  n’asalawo okwagala okumutusaako obulabe naddukira ku poliisi .

Yagasseko nti  bba takozesa biragalalagala naye tamaanyi lwaki yatabuse natuuka okukola efujjo ku basirikale  kuba ensonga yazitegeezzako aba Famire ne bakubira Alinda akwate omwana amuddize Nakiwu n’abagamba nti tajja ku mumuwa okujjako ng’afudde

Ali Kijambu Mubiru akulira eby’okwerinda  e Katooke Kisimu  ensonga z’abafumbo bano LC ebadde ezimaanyiko ng’era baali babawaadde ennaku biri batuule mu nsonga zaabwe ate Alinda we yafumitidde omusirikale ekiso mu mulubuto , yagasseko nti Alinda abadde takozesa biragalalagala naye abadde anywamu ku mwenge , Alinda yategeezezza nti bino byonna okubaawo yabadde tamaanyi bigenda mu maaso yabitegedde luvannyuma ng’ali muddwaliro e Mulago ku mpingu