Omulambo gw’omutemu Sserunkuuma guziikiddwa mu nkukutu

Bya Henry Kasomoko

ABAFFAMIRE ya Enock Sserunkuuma bagenze mu ggwanika e Mulago ne baggyayo omulambo gwe mu kyama ne bagukukusa okutuuka e Semuto gye gwaziikiddwa ku mukolo ogw’ekimpoowooze.

Omulambo gwa Sserunkuuma gubadde gukuumibwa mu ggwanika e Mulago okuva February 25, 2023, abantu lwe baamutaayiza e Lungujja ne bamutta mu ngeri y’okwesasuza olw’okutemula Lwomwa Ying. Daniel Bbosa.

Ensonda zaategeezezza nti abaf­famire baatuukiridde abakozi ku ggwanika mu kyama ne beeyanjula era ne basaba omulambo gw’omuntu waabwe.

Omu ku bakozi ku ggwanika eyasabye amannya ge okusirikirwa yategeezezza Bukedde nti ku bazze kwabaddeko n’omukyala omukulu ey­asoose okugaana okwennyonnyolako ebimukwatako wabula ab’eggwanika oluvannyuma lw’okusoya abaffamire kajogijogi w’ebibuuzo kyategeerekese nti ye yabadde nnyina w’omugenzi.

Bwe baakwasiddwa omulambo gwa Sserunkuuma, abaffamire baawandiise nti baabadde bagenda kuziika mu bitundu by’e Busunju era baapangi­sizza kkampuni enziisi okubanguyiza enteekateeka z’okutambuza.

Bambega ba Poliisi abaalondodde entambula zaabwe balaze nti tebaatu­use Busunju wabula baasalinkirizza ne baggukira e Semuto gye baaziise