"Mwekkiririzeemu kibayambe okukola obulungi mu bya PLE"
Abayizi ba P7 bakubiriziddwa okweggyamu okutya n’obutekkiririzaamu kibayambe okukola obulungi mu bigezo byabwe ebya PLE.
"Mwekkiririzeemu kibayambe okukola obulungi mu bya PLE"
By Bukedde Omusunsuzi
Journalists @NewVision
Bino byayogeddwa Rev. Christopher Mugabi Mukhose ow’ekkanisa ya Holy Trinity Church Of Uganda e Makerere Kivvulu, bwe yabadde asabira abayizi ba Brain Tree Primary School e Kyanja ku Ssande.
Rev. Mugabi yagambye abayizi nti balina okukimanya nti Katonda yabamanya nga tebannatondebwa mu mbuto za bannyaabwe, noolwekyo byonna ebibatuukako mu bulamu era Katonda abimanyi.
Yakubirizza abazadde okuwa abaana baabwe amaanyi n’okubakkiririzaamu lwe bajja okukola obulungi.
Yeebazizza Agnes Mukasa eyatandikawo essomero lino olw’okulengerera ewala n’agamba nti abayizi bangi abayise mu ssomero lino abali mu bifo ebyobuvunaanyizibwa.
Oluvannyuma lw’okusabira abayizi n’okubasiiga amafuta baasaze kkeeki era abayizi abasinze bannaabwe mu bintu eby’enjawulo ne baweebwa ebirabo okubasiima.
Caption Rev. Mukhose ne Agnes Mukasa nga basala kkeeki n’abayizi ba P7 aba Brain Tree Primary School.