Muntu asabye Bannayuganda okwefumiitiriza ku Pulezidenti eggwanga gwe lyetaaga

GEN.Mugisha Muntu asabye Bannayuganda okwefumiitiriza ennyo ku kika kya Pulezidenti Uganda gwe yetaaga mu kiseera kino nga bayaayanira enkyukaakyuka.

Muntu bw'abadde asaggula akalulu mu Busia munisipaali mu lukung’aana lwe yakubye ku Market Square e Busia, Muntu yasabye Bannayuganda  okweyambisa obulungi ekiseera kino ekisigadde okusuula akalulu okwefumiitiriza ennyo ku Pulezidenti ki Uganda gwe yeetaaga.

Muntu ng'ayogerako n'abatuuze ku Market Square

Ono agambye nti Bannayuganda bangi bayaayaanira enkyukakyuka nti naye tebafuddeyo ku bisaanyizo Pulezidenti gwe basaanye okulonda by'ateekeddwa okuba nabyo.

Muntu agambye nti ebizibu ebisuza Bannayuganda nga bakukunadde omuli ebbula ly'eddagala mu Malwaliro, Enguzi, Ebbula ly'emirimo mu bavubuka n'ebirala byetaaga Pulezidenti atalina mululu era ng'alumirirwa eggwanga n'asaba Bannayuganda okwegendereza nga balonda.

Abantu b'e Busia beekokkodde zzaabu eyazuulwa mu kitundu kyabwe nga eno bategeezezza Muntu nga bwe batalina kye baganyuddwamu nga wano ategeezezza nti obuzibu buli ku bakulembeze abaluvu be baalonda.

Abantu nga bawuliriza Muntu ng'ayogera.

Bo abakyala mu munisipaali y’e Busia balaajanidde Muntu ku mbeera embi mwe bawangaalira nga bano abagumizza nti bwe bamulonda gavumenti ye yaakubasoosowaza okulabanga bakulaakulana.

Mu ngeri y'emu n'Abavubuka e Busia baalaajanidde Gen.Muntu ku bbula ly'emirimo erisusse ng'ate n'Ettaka bazadde baabwe kwebali babagobaganya n'abasaba bamulonde alwanirire obwenkanya.

Oluvannyuma Muntu yagenze e Tororo ng’eno olukungaana alukubye mu ggombolola y'e Mulanda abaayo  ne bamulaajanira ku bunkenke mwe bawangaalira olw'ebyenfuna ebyeyongera okukaluba buli olukya n'abasuubuzi nti bwe baamukwasa obwapulezidenti waakusookera ku kutereeza ebyenfuna by'eggwanga.

Muntu asinzidde Tororo n'akunga Bannayuganda okunywereranga ku nsonga entuufu wadde nga bayita mu kusoomoozebwa.