Omukazi agambibwa okwewamba n'assa ffamire ye ku bunkenke, akwatiddwa poliisi.

Aisha Nanteza 34, omutuuze w'e Katooke mu ggombolola y'e Nabweru mu Wakiso, y'akwatiddwa ku bigambibwa nti yeewambye n'ekigendererwa eky’okuggya mu bantu be ssente.

Bino, byabaddewo nga December 12 omwaka guno, Nanteza, bwe yategeeza nnyina Rose Nakanwagi ow'e Kasana Luweero nti yabadde agenda kumukyalira.

Kyokka teyatuuse nti enkeera nga Dec 13, muganda wa Nanteza, yafunye vidiyo ng'eraga nga Nanteza musibe amagulu, emikono n'emimwa ng'asuuliddwa mu nsiko era nga mulimu eddoboozi emabega nga lisaba obukadde 50 okumuyimbula.

Omwogezi wa poliisi mu Kampala Racheal Kawala, agambye nti ttiimu y'abaserikale yakoze omuyiggo n'emusanga e Kigombe mu distulikiti y'e Luweero era n'akwatibwa ne bamuggalira olw'okwewamba n'okuwa amawulire ag’obulimba.