Kyagulanyi asuubizza okulwanirira Abasiraamu abali mu makomera ne Bannayuganda bonna

Pulezidenti wa Nup Robert Kyagulanyi Ssentamu ne bakulembeze banne olugendo lw'okunoonya akalulu mu Makindye balutandikidde mu maka g'Omulangira Kassim Nakibinge e Kibuli.

Bano basoose mu nsinkano etakkiriziddwamu bannamawulire oluvannyuma Kyagulanyi n'omulangira boogeddeko eri abamawulire.

Kyagulanyi asiimye omulangira olw'okukkirizza okubakyaza n’asuubiza okulwanirira Abasiraamu naddala abali mu makomera ne Bannayuganda bonna. Amwebazizza olw'okusitulanga eddoboozi eri Bannayuganda abanyigirizibwa.

Omulangira Nakibinge akubirizza Bannayuganda naddala abavubuka okukuuma Eddembe n’asaba abakuumaddembe okukomya ebikolwa eby'okutulugunyanya bannansi babawe omukisa okuwuliriza bonna abeesimbyewo balyoke bakole okusalawo nga beesiimidde.

Nakibinge agamba nti okulonda kwa kiseera buseera kujja ne kugenda ng'ebikolwa eby’obukambwe ebyalabikira e Kawempe ne Gulu tebasaanye kuddamu kulabwako. Asabye akakiiko k’ebyokulonda okutegeka okulonda okw’amazima n'obwenkanya.