Mmengo ekungubagidde Lukabwe

Bya Samuel Balagadde ne Dickson Kulumba

MMENGO ekungubagidde Fredrick Lukabwe Kisirikko, ng’ono yaabadde ssentebe w’ekibiina ky’Olulimi Oluganda eyafudde ku Lwokubiri lwa wiiki eno.

Kisirikko 64, yafiiridde mu ddwaaliro e Mengo gye yaddusiddwa oluvannyuma lw’okugwa n’akubawo enkoona bwe yabadde ava ku Bat Valley Theatre okulaba omuzannyo.

Minisita w’amawulire, e Mmengo era omwogezi w’Obwakabaka, Israel Kazibwe Kitooke yategeezezza nti Obwakabaka bufiiriddwa omuntu abadde omutumbuzi w’Olulimi Oluganda era aweerezza obuteebalira.

 Wilberforce Kibuuka, ssentebe w’ekibiina ky’Abaami abafumbo e Namasuba, abadde munywanyi wa Kisirikko yamwogeddeko ng’abadde omujjumbize mu buweereza mu Kkanisa era omwagazi w’obuwangwa mw’asibuka.

Yagambye nti Kisiriko abadde Mukristaayo ow’amaanyi mu Kkanisa ya Katwe ll mu Bussaabadinkoni bw’e Mengo mu Bulabirizi bw’e Namirembe.

Abadde mmemba w’ekibiina ky’abasajja Abakristaayo, nga y’abadde ow’ebyenkulaakulana ku Bussaabadinkoni e Mengo ne ku Bulabirizi e Namirembe.

Abadde yeebuuzibwako mu kibiina ekigatta abavubuka abalina obulemu ku mubiri ekya Youth with Disabilities Development Forum (UPDDF).

Abadde yaakalondebwa ekitongole kya KCCA okuba omu ku bawabuzi ku kakiiko k’eby’okuzimba era nga muganda w’Omugenzi Dr. Aggrey Kiyingi naye eyafudde ku nkomerero ya September w’omwaka guno.

 Muky. Margaret Nankinga, akulira akakiiko ka Luganda, Lusoga, Lugwere Language Commission yagambye nti basaaliddwa nnyo Mw. Lukabwe.

Yamwogeddeko ng’eyabayamba ennyo okuvvuunula ebigambo by’olusawo ng’abizza mu Luganda n’Olusoga.

Omuwandiisi w’ekika ky’Endiga, Robert Mwesigwa Nviiri yategeezezza nti nga bali wamu ne ffamire, bafulumizza enteekateeka

y’okukunguba n’okuziika.

Ku ssaawa nnya ez’oku makya ga leero (Olwokuna) wagenda kubeerawo okusaba okw’okwebaza olw’obulamu bw’omugenzi mu Lutikko e Namirembe ate enkya ku Lwokutaano aziikibwe ku biggya bya bajjajja be, e Seeta -Namulonge ku ssaawa 8:00 ez’olweggulo.

EBITONOTONO KU MUGENZI KISIRIKKO

l Yazaalibwa mu ggombolola ye Busukuma mu Wakiso, nga bazadde be bagenzi: Azaliya Kiyingi Ssebbowa ne Perisika Norah Nakirijja ab’e Seeta – Namulonge mu Kyaddondo.

l Yakolerako mu Minisitule y’Ekikula ky’abantu mu kitongole ky’ebyobuwangwa n’ensonga z’amaka era eyo gye yavvuunulira ekiwandiiko ky’okusomesa abantu abakulu ekya Functional Adult Literacy (FAL) Primers okukiggya mu Lungereza okukizza mu Luganda.

l Ye yayiiya ennyimba (anthem) olw’abakadde n’olw’ekibiina ky’Abasajja Abakristaayo (CMF).

l Abadde amanyi era ng’ayogera ennimi ezisukka mu ttaano.

l Y’omu ku bannalujjuliro lwa Bukedde Fa Ma, kw’abadde asinziira okusomesa ebyobuwangwa n’olulimi.