Minisita agumizza ba Nkuba kyeyo ku babanyagako ettaka

Minisita omubeezi ow’eby’ettaka, Dr. Sam Mayanja agumizza bankubakyeyo ku bukuumi ku bintu byabwe, naddala ettaka lye bagula nga bali eyo ku mawanga, n’abakakasa nti minisitule eri mu kufuba okulaba ng’ebintu byabwe basobola bulungi okubirondoolera ku mutimbagano nga bakozesa amasimu, oba kompyuta.

Bino abyogeredde mu nsisinkano gy’abaddemu nabo, ng’ebadde ku Land Information Centre mu Kampala.

Minisita ategeezezza nti bannayuganda abakolera ebweru w’eggwanga abali eyo mu bukadde butaano baleeta ensimbi eziri mu kawumbi ka ddoola kalamba buli mwaka (mu za Uganda bwe butabarika busatu n’obuwumbi lukaaga-3,600,000,000,000), z’agambye nti ziyimirizaawo nnyo eby’enfuna by’eggwanga, era basaanye okuyambibwako nga batereeza eby’obugagga byabwe okuyita mu tekinologiya, basobole okusiga ensimbi eziwerako wano, okusinga okuziteeka mu mawanga g’ebweru.

Yagambye nti enkola eno enaatera okuggibwako engalo ng’eyitibwa Uganda National Land Information System ejja kuyambako mu kwewala abantu okutunda ettaka emirundi egisukka mu gumu, okulondoola ebikwata ku ttaka, okusinga eby’obugagga by’abali ku mawanga nga tebamanyi, nga ne bwe wabaawo azannyira ku kyapa kyo ofuna obubaka ku ssimu ne weekubira enduulu mu bwangu, ekijja okuyambira awamu ne bannayuganda bonna ababbibwako ettaka lyabwe.

Yayongeddeko nti minisitule y’ebyettaka ekwataganye n’ebitongole ebirala okuli ekifulumya endagamuntu okuyambako okukakasa obwannannyini ku bintu, wamu n’ekiwooza emisolo ki URA, nga kino kibayambye okulongoosa ensasula ku misoso egy’enjawulo egyekuusa ku by’ettaka, ekiyambye minisitule okwongera ku nsimbi z’ereeta mu kittaavvu kya gavumenti, ng’omwaka oguwedde gwokka baakuŋŋaanya obuwumbi 866, ze yagambye nti singa gavumenti ebaddizaako omutemwa, ne bongera okulongoosa empeereza eri bannayuganda ku by’ettaka.

Nairuba Wamala, akulira ekibiina ekigatta bannayuganda abakolera mu bukiikakkono bwa America, ne Canada, ki Uganda North American Association yategeezezza nti kino kigenda kubayambako obutamenyekera bwereere, kubanga ekyeyo kibamenya nnyo, era bawulira ennyiike nga waliwo abazannyira ku mmaali ya bankubakyeyo.

Deo Kalikumutima, munnamateeka wa bankubakyeyo bano yasabye minisita abateerewo woofiisi eyeetongodde ekola ku nsonga z’ettaka ly’abantu abali ku mawanga, kibanguyize okulondoola ebintu byabwe, ate bafune n’okumanyisibwa okuyita ku mikutu egy’enjawulo, ku butya bwe bayinza okukuuma obugagga bwabwe nga tebali kuno