Kkooti egobye okujulira kwa kanyama eyatta Moze Radio
KKOOTI ejulirwamu egobye okusaba kw'okujulira okwatekebwamu kanyama eyasibwa olw'okutta omuyimbi Moses Ssekibogo amanyiddwa nga Mozey Radio
Kkooti egobye okujulira kwa kanyama eyatta Moze Radio
By Margaret Zalwango
Journalists @New Vision
KKOOTI ejulirwamu egobye okusaba kw'okujulira okwatekebwamu kanyama eyasibwa olw'okutta omuyimbi Moses Ssekibogo amanyiddwa nga Mozey Radio.
Abalamuzi okuli Christopher Gashirabake ,Dr Asa Mugenyi ne John Mike Musisi bwebabadde bagoba okujulira kwa Godfrey Wamala amanyiddwa nga Troy bagambye nti kkooti enkulu yasengejja bulungi obujulizi obwaleetebwa oludda oluwaabi olwo nawa ensala ye.
Troy yajulira ngawakanya obujulizi,ensala nekibonerezo ekyamuweebwa omulamuzi Jane Frances Abodo ngagamba yeesigama ku bujulizi obutakwagana okumusingisa omusango.
Troy era yayongerako nti omulamuzi yamubigika ekibonerezo ekisukiridde okwawukana ku Bantu abalala abazze basingibwa emisango egifanaagana ogugwe.
Kyokka abalamuzi abasatu bagobye ensonga za Troy nebagamba nti waliwo abantu bangi abazze basingibwa emisango ngogugwe kyokka nebaweebwa ebinonerezo eninenne ddala okusinga ku kyamuweebwa.
Abalamuzi era baagambye nti okutta omuntu mu butanwa ekibonerezo kya myaka 15 kyokka nga kisobola okutwala emyaka wakati wesatu nekyokusibwa amayisa. Bagambye nti omulamuzi Abodo yatunuulira engeri Mozy gyeyattibwamu ssaako okwewozaako kwa Troy ate natoolako nebbanga Troy lye yali amaze ku limandi olwo naamuwa emyaka 12 emyezi esatu nennaku nnya.
Troy yajulira ngayita mu munnamateeka Sylvia Namubiru.
Troy kkooti yamusingisa omusango gwokutta omuntu mubutanywa ngomulamuzi yeesigama Ku bujulizi obwaleetebwa nazuula nga wadde Troy yali avunaanibwa gwabutemu kyokka teyalina kigendererwa kutta Mozey bwatyo namusingisa ogwokutta omuntu mu butanwa.
Omuyimbi Mozey Radio yafa nga February 1,2018 mu ddwaliro lya Case Hospital gyeyali addusiddwa okufuna obujjanjabi oluvanyuma lwokulwanagana okwaliwo nga January 22,2018 ku bbaala ya De Bar esangibwa Entebbe.