Katikkiro Mayiga alambudde Butambula okumanya ebyenjigiriza bwebitambula

KATIKKIRO wa Buganda Charles Peter Mayiga akedde mu ssaza ly'e Butambala okulaba emirimu gy'ebyenjigiriza egikolebwa mu kitundu kino. 

Ono atambudde ne Minisita w'ebyenjigiriza, Coltilda Nakate Kikomeko asookedde ku Gombe SS mu ggombolola y'e Kibibi. 

Abayizi ba Gombe nga bazina

Bano Katikkiro abeebazizza olw'okukuuma ennono y'essomero n'enkolagana n'obwakabaka kubanga gwe musingi gwalyo n'asaba bagukuume. 

Mayiga akyukidde abayizi n'abasaba okubeera n'ebiruubirirwa mu byonna byebakola nga kino kyakubawanguza mu bulamu nga bafuba okutuuka kweebyo byebaagala okubeera mu dda nga bamaliriza emisomo

Minisita w'ebyenjigiriza mu Buganda, Coltilda Nakate Kikomeko asabye abayizi bano okwekuumira mu bulamu obulungi nga beewala okukozesa ebiragalalagala. 

Katambala Hajj Sulaiman Magala nga yatwala essaza lino yeebazizza Kamalabyonna olw'okukulembera obulungi Obwakabaka ku lwa Kabaka.

Katikkiro Mayiga ng'abuuza ku Ssentebe wa disitulikiti ye Butambala, Rashidah Namboowa

Hajj Abdul Zzimbe nga yatwala Essomero ly'e Gombe, agambye batadde nnyo essira ku by'enjigiriza era neyeebaza Katikkiro olw'okutumbula Obutonde bwensi bwasimbye omuti mu kifo kino ng'abagenyi abalala mu Bwakabaka bwebaze bakola. 

Kati Katikkiro ayolekedde Kibibi Muslim SS awagenda okumusabirwa dduwa okujjaguza emyaka 12 ng'akutte Ddamula.