Abaawangula Umrah ya Bukedde bakwasiddwa ebiwandiiko byabwe

ABAAWANGULA Umrah ya BUKEDDE olw’okuddamu ebibuuzo ebibuuzibwa ebikwata ku ddiini y’Obusiraamu mu Ramadhan bakwasiddwa ebiwandiiko byabwe byebanaakozesa mu lugendo lwabwe.

Nga bayita mu kibiina ekitwala abantu ku Hijja ne Umrah ekya Muzaata and Others Hijja and Travel ababiri okubadde Ali Kavuma ne Joweria Kyowulire bakwasiddwa pasipooti zabwe mu butonmgole era balindirira lunaku lwebanaasitula okugenda mu lugendo lwabwe.

Entekateeka eno ewagirwa aba Chapa General Enterprises ltd wamu ne Bukedde T.v nga omuwanguzi addamu ebibuuzo ebibuuzibwa ku pulogulamu ya Bukedde eya TUKYOGEREKO mu kiseera kya Ramadhan.

Ali Kavuma yasiimye nnyo Bukedde n’aba Chapa General Enterprises ltd ne Bukedde olw’entekateeka eno n’ategeeza nga bulijjo naye bw’ayayanira okugendako ku Umrah.

Joweria Kyowulire nga naye yawangudde yategeezezza nga bw’atasooka kukikkiriza era neyebaza Katonda olw’okumutuusa ku buwanguzi buno.

Akulira Ddaawa mu Uganda era nga y’omu ku ba Dayirekita ba Muzaata and Others Hijja and Travel, Sheikh Yasin Kiweewa yasabye abantu bulijjo okujumbiranga okukola Umrah n’asaba n’abantu owkeyisanga obulungi lubeerera basobole okukuuma eddiini.

Abawanguzi basmbula ku Sande nga 28 December 2025.