Kalina ezimbwa esse omuzimbi

EKIZIMBE ekibadde kizimbwa e Katuuso - Buziga mu Munisipaali y’e Makindye mu Kampala  kigudde ne kittiramu omu ku bakozi ababadde bakola omulimu gw’okuyiwa enkokoto ku mwaliiro ogwokubiri.
Enjega eno yaguddewo ku Ssande akawungeezi abakozi ababadde batabula enkokoto
okusitula ekizimbe bwe kyabumbulukuse ne kibayiikira nga kigambibwa omusingi gwe
babadde bagisitulirako gubadde munafu.
Okusinziira ku batuuze, ekizimbe kibadde kyakamala wiiki bbiri nga kizimbwa nga buli
lunaku bayita ku bantu abasoba mu 14 abakola mu kifo kino. Prime Eduha, omutuuze
w’e Katuuso agamba abakozi ababadde batabula enkokoto yabayiseeko ku ssaawa 1:00
ey’akawungeezi nga bakola nga waliwo abatabula enkokoto mukyuma, abalala nga bali waggulu bagiweereza nga bwe bazimba. Wabula essaawa zaabadde ziyingira  2:00 ez’ekiro ne bawulira omusinde ogw’amaanyi ku kyalo, oluvannyuma baagenze  okukizuula ng’ekizimbe ekyabadde kizimbwa kiyiiseemu.
Waabaddewo abakozi abakola  emisana n’abalala nga bakola mu  budde obw’ekiro, era ekizimbe we  yagwiridde ng’abakola emisana bali ku kagaali (wheel barrow) esembayo bannyuke oluvannyuma abakola ekiro batandike okukola. Kalina ebadde ezimbwa ku nnyumba enkadde ebaddewo nga kwe basitulira okwongerako emyaliiro emirala nga  bagamba nti obunafu bw’ekizimbe wansi kye kyaleetedde okunafuwa kiryoke kiyiikemu.
Ssentebe wa LC I Katuuso Zooni, Fred Ntulume agamba nti nnannyini kizimbe amanyiddwaako erya Isaac, ye yali yatandika omulimu gw’okuzimba ekizimbe nga yafuna abavubuka abamuyambako mu kukola. Agamba ennyumba gye buvuddeko
yabaddemu abapangisa wabula babadde baafulumizibwamu ne batandika okwongerako
emyaliiro emirala waggulu oluvannyuma baddemu okuyingira nga bamalirizza. Poliisi ku Ssande ekiro yaggyeeyo abantu 3 ng’ababiri balamu ate omu ye yasangiddwa ng’afi  iriddemu. Eyafudde yategeerekese nga Derrick Wabwiire 26, ng’abadde asula mu  Katuuso mw’abadde ava okugenda okukola. Omwogezi wa  KCCA, Daniel Nuwe Abine yagambye nti okuzimba kubadde kukolebwa mu bumenyi bw’amateeka
era mu nkukutu awatali kitongole kya KCCA kugumanyaako.