Iran esabuukuludde mizayiro enkambwe

OMUKAMBWE wa Iran, Ayatollah Ali Hossein Khamenei obusungu bumweyongedde, n’asabuukulula mizayiro enkambwe eyitibwa Kheibar Shekan, ng’eno esobola okwetikka bbomu ezisukka mu emu, ate n’alabula America nti Iran egenda kutta abajaasi baayo emitwalo etaano, mu America baddireyo mu kkeesi.
Ayatollah yayongedde okuwera nti Iran egenda kubonereza Yisirayiri ng’egituusaako obulumi obw’olubeerera, olw’okuggulawo olutalo ku ggwanga lye eribadde mu mirembe.
Bino Pulezidenti wa America, Donald Trump, olumugudde mu matu, n’agamba nti wadde mu kusooka ekigendererwa kya America  tekyabadde kya kukyusa bukulembeze
mu Iran, naye ebintu gye biraga bayinza okuwalirizibwa okusuula Gavumenti ga Ayatollah singa teyeddako n’etandika  okukola ebintu ebigasa bannansi mu kifo ky’okuwakula entalo.
America bwe yamaze okukola ennumba ez’amaanyi ku nfo za ran eza nukiriya ku Lwomukaaga ekiro, okuli Fordo, Natanz ne Esfahan, Trump yalabudde Iran obuteetantala kukuba nfo za America eziri mu kyondo kya Buwarabu, kuba Tehran ejja kufuuka muyonga.
Wabula Iran ezzizza omuliro n’egamba nti egenda kutirimbula abajaasi ba America 50,000 bagikkakkanye amampaati.
Okusinziira ku mukutu gwa Daily Mail, munnamawulire ku tivvi y’eggwanga mu Iran, Mehdi Khanalizadeh, yagambye nti Trump kye yakoze, yabadde azannya zzaala ku bulamu bw’abajaasi ba America era bwe yalumbye Iran yasazeewo okwaniriza emirambo gy’abajaasi be emitwalo etaano abagenda okuttibwa essaawa yonna. Bino we bijjidde nga Iran yamaze dda okulabula America ti kye yakoze okukuba nukiriya
waabwe, yagguddewo olutalo olutaliiko kkomo, nga bagenda kwesasuza emirembe gyonna paka ensi lw'eriggwaawo. Ye omwogezi w’ekibinja ky’amagye ga Iran ekya Islamic Revolutionary Guard Corps (IRGC), Ebrahim Zolfaghari yagambye nti obulumbaganyi America bwe yakoze ku ttaka ettukuvu erya Iran egenda kubwejjusa kuba baakukola ennumba ez'amaanyi, ate nga nzibu za kwetegekera, era tezigenda kukoma. Yalabudde Trump gwe yayise omuzannyi wa zzaala nti olutalo luno ye
yalutandise, naye Iran y’egenda okulumaririza.
IRAN EKOZE ENNUMBA KU YISIRAYIRI
Iran ng’ekozesa mizayiro zaayo ze yasabuukuludde, eyongedde okusesebbula Yisirayri,
ng'egyesasulizaako olwa America okukuba enfo zaayo eza nukiriya, era mu lulumba lwe yakoze, yalese abatuuze ba Yisirayiri 8,000 tebalina masannyalaze.
Minisita w’amasannyalaze mu Yisirayiri, Eli Cohen yagambye nti mizayiro za Iran zaakubye ebyuma ebitambuza amasannyalaze ne bisaanawo, ekyalese ebyalo
ebiwera nga biri mu kibululu.
Wabula yagambye nti embeeraeno baali baagyetegekera, era bakola ekisoboka okulaba ng’amasannyalaze gaddako.
YISIRAYIRI EKUBYE EKKOMERA
Mu nnumba Yisirayiri ze yakoze ku Iran eggulo, yasudde bbomu ku kkomera ery’omutawaana Ayatollah gy'asibira abamuwakanya eriyitibwa Evin Prison erisangibwa
mu kibuga Tehran.
Okusinziira ku kiwandiiko ekyafulumiziddwa amagye ga Yisirayiri ag’omu bbanga aga Israel Air Force, baabadde baagala kukuba ofiisi z’abeebyokwerinda eziri m itundu kino, era nnyingi baazirese ku ttaka.
Wankaaki w’ekkomera lino nayeyakubiddwa, kyokka Iran yagambye nti embeera yasobodde okugikwataganya mu bwangu ng’abasibe tebannatoloka. Minisita wa Yisirayiri ow’ebyokwerinda, Israel Katz, yagambye nti ennumba ze baakoze baakubiddemu ekitebe ky’amagye, ekitebe ky’ekitongole ekikessi, ekibangirizi kya Palestine Square, Iran we yassa essaawa ebala okutuusa Yisirayiri lw'eneesanyizibwawo omwaka 2040 we gunaatuukira.
PUTIN ALUMBYE AMERICA KU BY’OKUKUBA IRAN
Pulezidenti wa Russia, Vladimir Putin, agambye nti America teyabadde na onga yonna lwaki ekuba nukiriya wa Iran, era n’abagumya nti mwetegefu  okuyamba Iran singa eneeba emwetaaze.
Bino Putin yabibuulidde minisita wa Iran ow’ensonga ez’ebweru, Abbas Aragchi, bwe yabadde amukyaliddeko
mu Russia. Okusinziira ku mukutu gwa Aljazeera, Araghchi yeebazizza Putin olw’okuvumirira ekikolwa kya America, era n’amusaba okuyimirira ne Iran  mu kaseera kano ak’okusoomoozebwa kw’erimu ng’erumbiddwa.
EBIKWATA KU MIZAYIRO YA IRAN EMPYA
Mizayiro ya Iran eya Kheibar Shekan eyakozeseddwa okukuba ekisaawe ky’ennyonyi ekya Ben Gurion n’ebitebe by’amagye mu Yisirayiri
ekyatabudde amagye ga Yisirayiri nga geebuuza kye gagenda okugikolera. Mizayiro eno  yeetikka bbomu ssatu obutafaananako ne mizayiro endala ezibadde zikozesebwa, ezeetikka bbomu emu. Buli bbomu eri mu mizayiro eno ezitowa kkiro 1,500, ng'ekifo
w'eba ekubye ereka buli kimu kisesebbuse. Iran bwe yagikozesezza eggulo ya-