Hajji Bulwadda asiibuludde Abasiramu ba Vision Group

Hajji Hassan Bulwadda awadde Abasiraamu ba Vision Group  kkiro z’omuceere 325 zibayambeko mu kusiibulukuka n’asaba n’abalala abalina obusobozi okwettaniranga okusaddaaka kubanga kulimu empeera okuva eri Allah.

Bulwadda  bw’abadde akwasa Abasiraamu omuceere ku kitebe kya Vision Group mu Kampala ategezezza nga abantu abalina ku nsimbi naddala abavubuka bwebasaanye okusitukiramu bayambe ku balala.

Hajji Bulwadda ategezezza nga bweyatuukiriddwa Ssentebe w’Abasiraamu ba Vision Group n’amubuulira ku bumu ku bwetaavu obuli mu bamu ku Basiraamu ba Vision Group nga kino kyekyamuwalirizza okusitukiramu.

Hajji Bulwadda nga akwasa Khasifah Naava ettu ly'omuceere

Ssentebe w’abasiramu ba Vision Group, Ali Kizito Musoke asiimye nnyo Hajjin Bulwadda olw’okuvaayo  n’alaga omutima omugabi n’abaduukirira n’ebyokusiibulukuka mu kiseera kino ekya Ramadhan.

Asabye n’abalala okutwala ekikolwa kino nga eky’okulabirako wakati mu by’enfuna ebyekanamye baduukirire Abasiramu bonna si mu kisiibo kyokka wabula ne mu nnaku endala nga Idi.

Abamu ku bafunye ku bintu bino nga bakulembeddwamu Sarah Zawedde ne Hasifah Naava basiimye nnyo Hajji olw’omutima guno omugabi ne bamusaba okugenda nagwo mu maaso.