Gen. Muntu asabye bbanayuganda okufumintiriza nga balonda pulezidenti w'eggwanga

 

Muntu bw'abadde asaggula akalulu mu Busia Minisipalite mu lukungaana lweyakubye ku Market Square e Busia,Muntu yasabye Bannayuganda  okweyambisa obulungi ekiseera kino ekisigadde okusuula akalulu okwefumiitiriza ennyo ku Pulezidenti ki Uganda gweyetaaga.

 

Ono agambye nti Bannayuganda bangi bayayanira enkyukakyuka nti naye tebafuddeyo ku bisaanyizo Pulezidenti gwebasaanye okulonda by'ateekeddwa okuba nabyo.

 

Muntu agambye nti ebizibu ebisuza Bannayuganda nga bakukunadde omuli;Ebbula ly'Eddagala mu Malwaliro,Enguzi,Ebbula ly'emirimo mu bavubuka n'ebira byetaaga Pulezidenti atalina mululu era ng'alumirirwa e Ggwanga n'asaba Bannayuganda okwegendereza nga balonda.

 

Abantu b'e Busia bekokkodde Zzaabu ezazuulwa mu kitundu kyabwe nga eno bategeezezza Muntu nga bwebatalina kyebaganyuddwamu nga wano ategeezezza nti obuzibu buli ku bakulembeze abaluvu bebalonda.

 

Bo abakyala mu Busia Municipality balaajanidde Muntu ku mbeera embi mwebawangaalira nga bano abagumizza nti bwebamulonda gavumenti ye yakubasosowaza okulabanga bakulakulana.

 

Mu ngeri y'emu n'Abavubuka e Busia baalaajanidde Gen.Muntu ku bbula ly'emirimo erisusse ng'ate n'Ettaka bazadde baabwe kwebali babagobaganya n'abasaba bamulonde alwanirire obwenkanya.

 

Bo abasuubuzi baalaajanidde Gen.Muntu balaajanidde Gen.Muntu ku Magoba amayitirivu agali ku Ssente zebewola okukola bizinensi n'abakakasa nti bw'akwata obuyinza wakussawo ensawo ey'enjawulo ewola abasuubuzi n'Abalimi ku magoba amasamusaamu.

 

Oluvannyuma Muntu yagenze mu Disitulikiti y'e Tororo nga eno olukungaana alukubye mu Ggombolola y'e Mulanda abaayo  ne bamulaajanira ku bunkenke mwebawangalira olw'ebyenfuna ebyeyongera okukaluba bulu olukya n'abasuubuzi nti bwebamukwasa obwa Pulezidenti wakusookera ku kutereeza ebyenfuna by'e Ggwanga.

 

Muntu asinzidde Tororo n'akunga Bannayuganda okunywereranga ku nsonga entuufu wadde nga bayita mu kusoomozebwa