Faaza Kyamwe ajaguzza emyaka 50 mu busaseeredooti

Bwanamukulu w’ekigo ky’e Busuubizi, Fr. Denis Kyemwa ajaguzza emyaka 50 mu Busaserdooti. Paapa Leo XIV asiimye obuweerezabwe obulungi, n’amuweereza Omukisa gwe ogw’Obutume. Omukisa guno gwamukwasiddwa Omwepiskopi w’e Kiyinda-Mityana, Dr. Joseph Antony Zziwa.

Missa ey’okwebaza Faaza Kyemwa y'agyisomedde mu maka ga bakadde be e Luwala-Ggoli, mu disitulikiti y’e Mpigi, ku Lwomukaaga (December 13. 2025). Omukolo gw’abiddwako Abepiskoopi 3, okwabadde Ssabasumba Dr. Augustine Kasujja Omubaka wa Paapa, Omusumba w’e Kiyinda-Mityana Dr. Joseph Antony Zziwa, n'omusumba w’e Kasana-Luweero Rt. Rev. Lawrence Mukasa. Ba Viika-Genero b’essaza ekkulu ery’e Kampala. Msgr. Gerald Kalumba ne Msgr. Rogers Kabuye, nabo missa eno baagyibaddemu.

Bweyabadde ayigiriza, Omwepiskoopi Lawrence Mukasa y’asiimye  Faaza Kyemwa olw’engeri ennungi gy’akozeemu omulimo gwe ogw’Obusaserdooti, wakati mu bwetowaze, obukkakkamu, n'essanyu.

“Faaza Kyemwa mwagazi w’abantu ate ayagalibwa. Abantu abawa obudde. Tayita ku muntu ngatamubuuzizzaako, kaabe mwana muto. Ayagala nnyo ekikaakye eky’Engeye era tabula kumikolo gyakyo. Tumwebaza nnyo olw’okulwanirira ettaka lya Klezia. Talina wofiisi oba kkooti gy’atatuseemu ng’agezaako okutaasa ettaka lya Klezia,” Omwepiskoopi Mukasa bweyategeezezza,

Ssabasumba Dr. Augustine Kasujja yagambye nti Faaza Kyemwa ayambye Abakistu okutegeera obulungi nti Klezia Katolika eri kimu, bw’aweererezza mussaza lya Kiyinda-Mityana  emyaka 45, sso nga asibuka Ggoli, mu ssaza ekkulu ery’e Kampala, era ngayalina eddembe okukolera mu ssaza lino.

Omwepiskoopi Joseph Antony Zziwa n'aye yeebazizza Faaza Kyemwa. Y'ategeezezza nti ono yali mukkwaya eyayimba mu mmisa Omutuukivu Paapa Paulo VI gyeyasomera mu kisaawe e Kololo bweyakyala mu Uganda, mu 1969.

Katikkiro ng'awaayo ekitabo

Minista wa Kabaka owa gavumenti ez’ebitundu era nga ye Ssabakristu w’ekigo kya Lutikko ya Kiyinda-Mityana, Owek. Joseph Balikuddembe Kawuki y’atenderezza ekisa, obwetowaze, obukwatampola, n'obukkakkamu bwa Faaza Kyemwa, era n’ategeeza nti obukkakkamu buno bulijjo bw’abadde akozesa okuwangula abasaatuukira ku ttaka lya Klezia.

Katikkiro Charles Peter Mayiga yeewunyizza nnyo engeri Faaza Kyemwa azaalibwa abakungu ba Kabaka gyeyasalawo okugenda mu Busaserdooti,obutaliimu byanfuna, wadde okuwasa abakyala. Y’ategeezezza nti Jjajja wa Faaza Kyemwa, omugenzi Anderea Kyemwa Ssekiti yali Kasujju, era nga yomu ku ba Legenti abaakuuma Obwakabaka Ssekabaka Muteesa II bweyali mu buwanganguse (1953-55), ate kitaawe Gabriel Kaaya yali wa Gombolola e Maanyi mu Busujju, kyokka ebitiibwa n’ebirungi byeyali ayinza okwefunira olw’obuzaale bwe teyabitunuulira, n’asalawo okuweereza Katonda n’abantu be.

Abasisita nga bali ku mukolo

Y’asiimye Faaza Kyemwa olw’okukola Obusaserdooti bwe mu ngeri ey’egombesa, nga by’ayigiriza by’ayolesa mu mayisa ge, bw’atyo n’ayolesa era n’akuuma ekitiibwa ky’Obusaserdooti.

Bwanamukulu w'e Ggoli, Msgr. Joseph Njala yagambye nti Famire y'ab'Engeye Faaza Kyemwa mwasibuka bagyenyumirizaamu nnyo kubanga ebakoledde bingi, omuli n'okuwa ekigo yiika z'ettaka 60, wewaawo ngawaaliwo abaali bagezaako okulibba.

Faaza Kyemwa y’awuniikiridde olw'enkuyanja y’abantu abazze okumujagulizaako okwabadde n’Abasiraamu, sso nga Abasaserdooti ne Bannaddiini nabo baayitiridde obungi. Bonna y'abeebazizza olw’okumwagala, n’abasaba bongere okumusabira.