Poliisi eyigga kalittima eyasobezza ku bbujje n'alisuura mu kiyumba ekitannaggwa

Poliisi e Kibiri mu munisipaali y’e Makindye Ssaabagabo e Wakiso, eyigga omuntu ow’ettima, awambye omwana omuto,  n’amusobyako n'aleka ng'amusudde mu kiyumba ekitannaggwa.

Omwana ono ateeberezebwa okuba mu myaka ng'etaano, asangiddwa mu kiyumba ekitannaggwa e Ggangu ku luguudo lw'e Busaabala ng'avaamu omusaayi.

Kitegeezeddwa nti asoose kutwalibwa ku poliisi y' e Kibiri, oluvannyuma nnaabakyala mu kitundu ekyo n'abazirakisa abalala, ne bamwongerayo mu ddwaaliro nga bwe banoonya bazadde be.