Engeri Omulangira Harry gy’asattiza Obwakabaka bwa Bungereza

OMULANGIRA Harry, mutabani wa Kabaka Charles III asembayo, ayanise ebyama bw’Obwakabaka bwa Bungereza omuli obusosoze, okwegulumiza kwa mukulu we William, obutaagaliza n’enkwe ezijjudde mu lulyo Olulangira n’alayira nti ye ne mukyala we Meghan Markle tebagenda kuddamu kubeera Bungereza!
Ebigambo bino ebikaawa ng’omususa, Harry yabyogeredde mu kitabo kye yatuumye ‘Spare’ nga kyogera ku by’azze ayitamu mu bulamu bwe okuva lwe yazaalibwa. Yakifulumizza ggulo ku Lwokubiri.
Kyokka ng’ekitabo kino tekinnafuluma, Harry azze akiranga ng’ayita mu mboozi ez’akafubo ng’asomolayo ebimu ku bikirimu ku mikutu gya ttivvi ng’asinziira mu America gye yaddukira ne mukyala we okwewogoma ebizibu bye yali ayitamu ng’ali Bungereza.
Harry ayanise ebimu ku byama eby’omunda mu ffamire ye ey’Olulyo Olulangira ebitali bya bulijjo ng’okutuusa kati bikyatakuza Obwakabaka emitwe.
ABALANGIDDE OBUSOSOZE
Harry agamba nti ab’Olulyo Olulangira ‘baafa emitima’ bwe gutuuka ku kusosola. Yagambye nti okuva lwe yafuna mukyala we, Omumerica - Meghan Markle, abooluganda bonna baamulagirawo nti tebamusiimye kuba si Mungereza. Agamba nti Kkwiini Elizabeth II (jjajja we) ng’akyaliwo yakola ng’omuntu omukulu okugezaako okukweka obusosoze buno naye kyaddaaki bweggyayo. Yagambye nti bwe yalaba obusosoze ne mukyala we okumussa ku nninga bisusse kwe kusalawo okuva mu mbiri z’e Bungereza ezeebitiibwa n’asengukira mu America gy’afunidde ku buweerero.
ALOJJA LWE BAAMULEKA EMABEGA NGA KKWIINI MUYI N’ASANGA NG’AFUDDE!
Harry mu kitabo kye agamba nti ab’Olulyo Olulangira nga bakulemberwa kitaawe, eyali akyali Omulangira Charles tebaamuteeka ku lukalala lw’Abalangira n’Abambejja abaalina okugenda okulaba Kkwiini Elizabeth ku ndiri kwe yafiira mu lubiri lwe olwa Balmoral Castle mu Scotland.
Harry nga yenna munyiikaavu agamba nti ye ne mukyala we Meghan baali Bungereza mu kibuga London ku lunaku Kkwiini lwe yafa nga bali ku mikolo egy’okusonderako ssente okudduukirira abeetaaga obuyambi. Naye ekyamuggya enviiri ku mutwe kwe kuwulira nti aboolulyo Olulangira bonna baali balinnye ennyonyi ne bagenda e Scotland nga ye tebamunyeze!!
Agamba nti bano baamulemesa okulaba ku ‘jjajja mukyala we’ nga tannafa n’ategeeza nti newakubadde yafuba okupapiriza atuukeyo mu bwangu, yasanga Kkwiini yafudde dda nga n’okumugolola kuwedde. “Nasooka kwogera ne mukulu wange William, ne mmubuuza nti ggwe ne mukyala wo Kate munaatambula mutya okutuuka e Scotland? Mu kiseera nga nkyalinze okunnyanukula, we nnawulirira nti abalangira n’abambejja ababeera mu mbiri okuli olwa Windsor n’olwa Ascot balinnye ennyonyi ne bagenda nga nze tebambikidde!’’ bwe yagambye.
KITAAWE AMUBIKIRA KKWIINI ATE N’AMUGAANA OKUTWALAYO MEGHAN
Harry agamba nti mu kiseera ng’akyalinze William okumuddamu, kitaabwe, kati Kabaka wa Bungereza - Charles III yamukubira essimu n’amutegeeza nti Kkwiini afudde era n’amuyita nti ayanguweko mu lubiri Balmoral kyokka n’amukomekkereza nti tageza n’atwalayo mukyala we (Meghan). Agamba nti ennyonyi yagirinnya alina n’ebiyengeyenge, ebitaali bya kufiirwa Kkwiini yekka naye n’okwebuuza lwaki basosola mukyala we obwenkanidde awo!
ALOJJA WILLIAM LWE YAMUKUBA
Harry yanyumizza mukulu we William (alinze okulya Obwakabaka), lwe yamusindika n’agwa wansi bwe baali boogera ku nsonga za Meghan ye (William) gw’ayita omukazi omuzibu ennyo.
Agamba nti bwe baawaanyisiganya ebisongovu, mukulu we yaswakiira n’amugwa mu bulago, n’amukwata ekitogi (mwe yayuliza n’omukuufu gwe) olwo n’amukuba ennume y’ekigwo mu lubiri lw’e Kensington - London gye baali babeera nga tebannava Bungereza. “Wansi we yansindika nnagwiira ekisowaani ky’embwa kyonna ne kinjatikira mu mugongo, ebibajjo byakyo ne binfumitafumita nzenna. Nnagalamira awo okumala eddakiika eziwera kye nnava nsituka ne mmugamba anve mu maaso, n’afuluma n’agenda.”
Agamba nti okuva lwe baafiirwa nnyaabwe (Omumbejja Diana) William yatandikirawo okumulaga omutima ogw’ekko, nga ne ku ssomero yamulagira nti talina kumwewuluntako era talaga bayizi nti amumanyi, era naye kye yakola.
Yayogedde ku ngeri kitaabwe gye yaleetamu Camilla:
Omulangira yatuuse ne ku mboozi y’engeri kitaabwe, Kabaka Charles III gye yabanjulira omukazi Camilla (omukazi eyajojobya ennyo nnyaabwe), alyoke amuwase mu 2005 newankubadde baali batutte emyaka egiwera nga beeyendako