Ab'e Nakaseke bakozesa booda ya 30000/- okutuuka webagemera abaana
Abaana abatagemwangako nabatamalaayo doozi kikyali kizibu kinene nnyo mu disitulikiti ye Nakaseke.
Maama w'abaana alaze byebayitamu okugemesa abaana
By Ruth Nazziwa
Journalists @New Vision
OMUWENDO gw’abaana abatagemwangako mu Disitulikiti ye Nakaseke gweralikiriza nga kino kivudde ku ngendo empanvu abazadde zebatindigga okutuuka mu malwaliro n’enguudo embi.
“Nakoma okugemesa omwana wange asooka lwe nnali mu ddwaliro nga nnaakamuzaala ne nnemerererwa okumuzzaayo nga sirina ssente za booda. Nkozesa 30,000 eza booda ate enkuba bwetonnya ne gujabagira.
Akulira eby'obyobulamu mu district ye Nakaseke ng'annyonnyola
Era bwetwafuna abasawo bba Amref abajja abatuleetera obujanjabi mu kyalo, nnakiraba ng’omukisa ogutugwiride nentwala omwana wange ne bamugema era kati ne bwemba sirina ssente ntambulawo n'embagemesa ne bafuna n'obujanjabi obulala” Rebecca Nagawa bwatyo bwagamba.
Moses Yawe omubalirizi w'ebitako mu disitulikiti y’e Nakaseke agamba nti abasawo bokubyalo abokumiluka bakoze bulungi okutussagulira bba maama n'abaana abetaaga obuwereza obwokugemebwa endwadde ezitali zimu naddala abaana abali wansi w’omwaka gumu.
Mu mbeera eno olw’obuyambi bwetwafuna okuva mu kitongole kya Amref, tusobode okugema abaana ebitundu 83 ku buli 100 .
Tulabika nga abakola obulungi okutwaliza awamu naye ebitundu nga Ngoma ne Kinyogogga biri wala okutuuka ku malwaliro , ssaako ne kizibu ky’enguudo embi. Tutandika n'abaana bangi okugema naye ebitundu 13 ku buli 100 tebamalaayo ddoozi, abalala abali wakati w’ebitundu 14 ne 17 ku buli 100 tebagemwangako.
Akulira ebibalo nga naye attottola
Dr Simon Aliga atwala eby’obulamu mu disitulikiti y’e Nakaseke agamba nti abaana bangi abatagemwangako okuva mu bitundu eby’enjawulo.
Okugonjoola obuzibu buno, buli mwezi tulondayo amalwaliro munaana netusembeza obujanjabi obwenjawulo ,bwetumaliriza netulyoka tudda mu butundu ebirala