Ekitongole ky'embeera y'obudde mu ggwanga kiwabudde Bannayuganda

Bya Racheal Nankya

EKITONGOLE  ekivunaanyizibwa ku mbeera y'obudde mu ggwanga (Uganda National Meteorological Authority) kiwabudde abantu mu bitundu by'eggwanga eby'enjawulo ku ngeri gye bagenda okulima mu biseera bino ebikyukakyuka.

Akulira ekitongole kino ow'ekiseera, Bob Alex Ogwang bw’abadde mu lukungaana lw'abamaawulire ku Media Center mu Kampala ategeezezza nti enkuba esuubirwa okweyongera okutonya okuva mu mwezi guno okutuusa ogw'omunaana mu sizoni eno mu bitundu by'omumambuka okuli: Zombi, Nebbi, Arua n'ebitundu ebiriraanyewo.

Ate mu buvanjuba ebitundu nga: Kamuli, Iganga, Bugweri, n'ebitundu ebiriraanyewo,  sizooni ejja kubeera nnungi eri abalimi b'omu bitundu bino.

Ogwang akubirizza abalimi b'omu bitundu bino okukwatagana n'abalimisa baabwe okwongera okubalungamya ku nkozesa y'ettaka ennungi okusobola okwongera ku birime byabwe.

Abantu b’omu bitundu eby'amaserengeta, masekkati naddala mu Buganda, okwetoloola ennyanja Nalubaale abali mu bitundu by'e Masaka basuubirwa okufuna enkuba entono ddala n'abakubiriza okwettanira enkola ez'okutereka amazzi beewale okugoonoona.

Abalaalo nabo bakubiriziddwa okutereka ebisagazi okusobola okufuna ebiriisa ebimala eri ensolo zaabwe nga sizooni n’ebweba ewedde basigala balina kye baziriisa.

Ogwang akubirizza ebitongole ebivunaanyizibwa ku nguudo mu bitundu eby'omu mambuka n'ebuvanjuba okugogola obulungi enguudo, okwewala amazzi okwanjaala, obutaleeta mataba olw'enkuba esuubirwayo. 

Awadde abantu mu bitundu ebyo amagezi obutavuga n'okutambula mu bitundu ebirimu amataba, olw'ensonga amazzi gajja kubatwala wabula bagumiinkirizze gagende.

Ogwang awabudde ne ku laddu  ezisuubirwa mu bitundu by'eggwanga ebisinga era n'akubirizza abantu obutabeera wansi wa miti, obutesigama byuma wamu n'okusaayo obuuma obukwata laddu zino.