Abasuubuzi beemulugunyizza ku bamusigansimbi

 

Ekitongole kino ekimanyiddwa nga "Uganda Investment Authority(UIA)", okuvaayo kiddiridde abasuubuzi okuvaayo ne balumiriza abamu ku Bamusigansimbi okuva mu bibangirizi by'amakolero ebyabaweebwa Gavumenti okukoleramu emirimu gyabwe,ne beesogga ekibuga okutandika okuvuganya nabo ku bakasitoma..

 

Abasuubuzi bano abeegattira mu bibiina okuli;United Arcades Traders and Entrepreneurs' Association(UATEA) ,Kampala City Traders' Association(KACITA) ne Kampala Arcades Advocacy Forum(KAAFO), be balumiriza Bamusigansimbi okupangisa amaduuka mu akeedi z'omu Kampala ez'enjawulo ne batandika okulejjesa n'okuguza bakasitooma baabwe ebintu bye bakolera mu bibangirizi by'amakolero ku bbeeyi eya wansi.

 

"Tusiiba tukonkomalidde mu akeedi olwa Bamusigansimbi bano okulekeraawo okutusuubuza ebintu byabwe ne batandika okubigguza bakasitoma baffe obutereevu nga basinziira mu madduuka ne sitoowa ze bapangisiza mu kibuga wakati," bwatyo ssentebe wa UATEA,Edward Ntale, bwe yalaze obutali bumativu kunsonga eno.

 

Yeegatidwaako banne okuli;ssentebe wa KACITA, Thadius Musoke n'omuwandiisi wa KAAFO,Francis Ddamulira,nabo abakkatiriza ensonga y'okubulwa bakasitoma  olw'enkola ya Bamusigansimbi bano .

Era ne bakukulumira ekitongole kya UIA olwa kye baayise okusukulumya abantu bano ku Bannansi mu ggwanga ekibawadde omukisa okuteteeganya emirimu by'abasuubuzi abaabulijjo.

 

UIA EBAWABUDDE;

 

Bwatuukiriddwa ku nsonga eno,omu ku boogeze ba UIA,David Rupiny,abasabye okusookera okwetegereza oba abantu be boogerako ddala Bamusigansimbi kubanga si buli Mugwiira akola bizinensi nti abeera Yinvesita.

 

Annyonnyodde nti;

Oyinza okwesanga ng'abantu be boogerako basuubuzi baabulijjo abafuna layisinsi ezibakiriza okubeerako emirimu gy'ekisuubuzi gye bakolera mu ggwanga.

Okugeza;abalina zi supamaketi,abatunda emmotoka ne pikipiki,abatunda eddagala n'abalala,abatera ogenda mu bitongole bya gavumenti nga "Uganda Registration Services Bureau(URSB)" ne bawandiisaayo bizinensi zaabwe zino.

 

Era ne bafuna ne layisinsi ezibakkiriza okukolera emirimu mu ggwanga,naye nga si Bamusigansimbi abakolera wansi wa UIA.

Abawadde amagezi okutwala ensonga yabwe eri ministule y'ebyoobusuubuzi n'amakkolero,kubanga be balina obuyinza obukola kunsonga eno gyaayise ey'ebyobusuubuzi.

 

Bino we bijjidde ng'abasuubuzi baakamala okusisinkana abakulira ekitongole ekisolooza omusolo mu ggwanga eya Uganda Revenue Authority(URA) ku Lowkutaano emisana kunsonga y'emu .

Era ne bakwaasa akikulira,John Musinguzi, ebbaluwa emusaba okugira ng'ayimiriza entekateeka y'okukyuusa emisolo ku ngoye gye yabadde etandise okuteeka munkola okutuusa nga gavumenti emaze okugonjoola okweemulugunya kwabwe.