Ekitongole ky'amazzi mu ggwanga kirabudde abagabba
EKITONGOLE ky’amazzi ekya National Water and Sewerage Corporation kirabudde bakasitoma baakyo ababadde babba amazzi okukomya omuze guno kubanga kiri mu nteekateeka ey’okugugema olw’enteekateeka empya gye baleeta .
Ekitongole ky'amazzi mu ggwanga kirabudde abagabba
Ying. Silver Mugisha, ddayirekita w’ekitongole ky’amazzi bw’abadde asisinkanye aba Uganda Industrial Research Institute e Namanve agambye nti mu kwongeza omutindo mu mpeereza zaabwe mu kubunyisa amazzi mu Uganda n'okukendeeza obubbi bwago, ekitongole kiteekateeka enkola empya eri bakasitoma baakyo okusasula amazzi nga tebannagakozesa.
Ying.Gilbert Mugwere (ku kono) okuva mu NWSC ng'alaga mmita empya ze bagenda okukozesa okwewala
Yayongeddeko nti omuntu ayagala amazzi alina kusooka kusasula nsimbi n’asaba amazzi ago g’aba asobodde okusasula okusinziira ku nsimbi z’alina.
Ategeezezza nti newankubadde enkola empya gye baagala okutongoza tegenda kumalirawo ddala kizibu kino, ejja kwongeza ku misolo eggwanga lye gifuna mu nkola eno era eraga engeri amazzi gye gapimibaamu wamu n’okugabala .
Asuubizza bakasitoma baabwe nti enkola eno egenda kwettanirwa mu bwangu weewawo nga tennatandika mu butungole wabula egya kujjira mu mitendera .
Polof. Charles Kwesige akulira Uganda Industrial Research Institute akakasizza ku nkolagana gye baatonzeewo ne National Water and Sewerage Corporation n’agamba nti enkwatagana eno egenderedde okuvumbula obukugu wamu n’obusobozi bwe balina mu nkulaakulana y’eggwanga .