Ekifo kya Mabiito e Nateete ne Happy Boys e Busega biggaddwa

Bya Vivien Nakitende

WAABADDEWO akasattiro ku kifo kya Mabiito e Nateete, poliisi bw’ezinzeeko ekifo kino n’eggalawo n’okugobamu bonna ababaddewo.

Amawulire agaasoose okusaasaana gaabadde gagamba nti mwasangiddwaamu bbomu nga bwe gwali mu September w’omwaka oguwedde (2023), poliisi bwe yakisangamu bbomu era n’etegululwa.

Abakolera mu kifo kino omuli bamalaaya n’abasuubuzi abakoleramu emirimu egy’enjawulo omuli; abatunda emmere, omwenge, abatunda amayirungi bonna baagobeddwa mu kifo kino.

Ensonda okuva mu poliisi zitegeezezza nti, mu kiro ky’Olwomukaaga, poliisi erwanyisa obutujju yazze n’embwa zaayo ezikonga olusu ne beekebejja ekifo kyonna bbomu n’ebula, wabula era ne bakiggala nga bwe beetegereza embeera.

Poliisi era yaggadde n’ekifo ekirala ekikuhhaanya abadigize e Busega ekya, Happy Boys.

Amyuka omwogezi wa poliisi mu Kampala n’emiriraano Luke Owoyesigyire yagambye nti, Mabiito yaggaddwa, kubanga bakyalina ensonga ze beekenneenya era bwe banaamaliriza baakubuulira abantu ekyabaddewo n’ekiddako.

Yakubirizza abantu okwegendereza ebifo bye bagendamu.