Bamalaay b'e Mabiito balumirizza abasirikale be Nateete okubakaka akaboozi

BAMALAAYA b’oku Mabiito e Nateete balumirizza abaserikale ba Poliisi y’e Nateete okubakanda akaboozi k’ekikulu naddala mu kiseera mwe bakolera ebikwekweto, bagamba atakikola bamutwalirawo mu kkomera n’asibwa.!

Bano nga bakulembeddwamu Naabakyala waabwe Annet Nansasi olw’akutte akazindaalo, yatandikidde ku kya Poliisi banne bonna ne basaakaanya, yategeezezza nti bano babafudde olusuku atalina ssente takyasobola kukolera ku Mabiito.

Yagambye nti babakolako ebikolwa by’efujjo byonna nga ne bwe bakusanga ng’oli bukunya mu kazigo ko ofuluma bute, ate bwe kituuka ku ky’okubaaza tekyetaagisa bakyala kukola mulimu guno wabula abasajja abatuuka n’okubakebera mu mbugo ekibesittaza.

Dorra Namuli naye akola guno eyabadde akulukusa amaziga naye ekizibu kye yatandise nakyo kya Poliisi gye yagambye nti ebatuntuza buli olukedde omuli okubakuba, okubakaka akaboozi k’ekukulu nga bw’ogaanira bakubuuza oba olina layisinsi ebakkiriza okukola omulimu ogwo olwo ne gubula asala.

Bamalaaya nga baloopa ensonga zaabwe

Yannyonnyodde nti n’ekisinga okubaluma ne bw’omugamba nti waakiri ssaako akapiira ka Galimpitawa takkiriza nga bw’olemerako embooko evuga wamu n’okubakanda ssente.

Ono yabalumirizza nti eky’okufuna ensimbi ku Mabiito baagufuula mugano, babamenyera obuyumba bwabwe n’okwonoona obulimu bwabwe bwe baba bataniseewo kyokka nga ebifo ebirala ebisanyukirwamu bisigala bikola nga tebikooneddwako.

Bino, baabadde babiroopera eyaliko omubaka omukyala w’e Ibanda mu Palamenti era amyuka akwanaganya enteekateeka za PDM mu ggwanga Jovrine Kyomukama Kaliisa, bwe yabadde agenzeeyo okubasomesa ku nkola eno enaabayamba okutandikawo obulimu obutonotono okweggya mu bwavu n’okulekulira omulimu guno gwe yagambye nti gubaweebuula ng’abakyala.

Yabasuubizizza okubawa ssente wabula n’abasaba okutandikawo zi Sacco mwe banaayitira okuzifuna era n’abasuubiza n’okubawa ebikozebwa mu kwekebera endwadde z’ekikaba kubanga nakyo bakyogeddeko ng’ekizibu ekibasumbuwa.

Amyuka omwogezi wa Poliisi mu Kampala n’emiriraano Luke Oweyesigire, yategeezezza nti bazze bafuna okwemulugunya kw’abakyala bano naye nga teri avaayo na bujulizi bukakasa kye boogera wabula yabasabye nti singa balaba omuserikale yenna akola kino ate balina obujilizi bamuloope ku Poliisi avunaanibwe kubanga nabo bavumirira ekikolwa ky’okukaka abakyala akaboozi.

Yategeezezza nti Poliisi tegenda kukomya kukola bikwekweto byayo naddala mu bifo nga bino kubanga mubaamu abamenyi b’amateeka be bateekeddwa okufuuza.