Bamalaaya abeekubidde mu kaduukulu beetondedde mu kkooti ; "gwabadde mwenge oweekitiibwa tetuliddamu"

BAMALAAYA basatu bafunye obutakkaanya ne balwana kyokka ne ku Poliisi gye baddukidde okutaasibwa beekubidde mu kaduukulu, katono bette olw'obusungu.

Esther Amina Nalumu 28, amanyiddwa nga Bouncer, Judith Kiiza 29 ne Janat Namuga 32 bonna beetundira ku Mabiito e Nateete mu Lubaga be baleeteddwa mu kkooti y'omulamuzi Adams Byarugaba eya Nateete Lubaga abasomedde ogw'okulwanira mu lujjudde ne bagukkiriza.

Bamalaaya Abeekubidde Mu Kaduukulu Nga Beegayirira Okubasonyiwa

Kigambibwa nti abasatu bano baapangisa obuzigo bwabwe ku Mabiito gye bakolera obwamalaaya kyokka nga November 27, 2024, Nalumu ne Namuga baafuna obutakkaanya ne balwanira mu lujjudde ekyakung’aanya abantu wamu n'okubamalako eddembe lyabwe.

Olw'okuba Kiiza mukwano gwa Namuga, yabiyingiramu okumutaasa batimpule Nalumu, beekuba ekyabaviirako bonsatule okufuna ebisago eby’amaanyi.

Baddukira ku Poliisi e Nateete ebataase kyokka eno baddamu buto okulwana, abaserikale baabaggalira mu kaduukulu kyokka eno nayo beesojja okukkakkana nga balwanaganye beeyuzizza engoye, beerumye abamu engalo zikutuddwa, beegudde mu bulago beetaagudde enjala.

Poliisi byagisusseeko kwe kubaggulako omusango guno ku ffayiro MCB; 126/2024 oluvannyuma n'ebasindika mu kkooti okuwerennemba nagwo.

Mu kkooti, baagukkizza era ne bafukamira okwegayirira omulamuzi abayimbule badde awaka okwejjanjaba nga bawoza kimu 'gwali mwenge oweekitiibwa tusaasire tetuliddamu kugunywa na kulwana'.

Yagaanyi okusaba kwabwe nti abakazi abakulu nga bo tebaalirwanidde mu lujjudde kweweebuula mu bantu n'abasindika mu kkomera e Luzira gye banaafunira obujjanjabi okutuusa nga January 14, 2025 lwe gunaddamu.