Ebisoko ebisibuka ku kufa

TUKYAGENDA mu maaso n’okutunuulira ebisoko. Ssande ewedde twatunuulidde ebisoko ebisibuka mu nsolo. Olwaleero ate ka tutunuulire ebisoko ebisibuka mu kufa. Mu byo mulimu bino wammanga:
1Okufa ky’ofiisa
Ekisoko kino kitegeeza kw’olesa buzira na buteeswaza newankubadde ng’oyita mu mbeera nzibu. Eky’okulabirako: Nakku bwe yategeera nti lipoota ye emalako siniya eyookusatu emulagira kudda mu kibiina, yafa ky’ofiisa naye ekirungi nti oluvannyuma lw’okuddamu ensoma ye yalongooka.
2Okufa ekisiiri
Ekisoko kino nakyo kitegeeza kuguma osobole okukuuma ensa n’ekitiibwa kyo. Okugeza osobola okusiba amaziga nga wandibadde okaaba, osobola okukulukusa amaziga nga wandibadde otema ebiwoobe.
Eky’okulabirako: Nannyombi bwe baamubikira taata w’abaana be, obulumi bwe bw’amusukkako yafa kisiiri n’asiba ekimyu yogaayoga mu ddwaaliro gye baali bakuumira omufu.
3Okufa obufi
Ekisoko kino kitegeeza kintu kusukka. ky’okulabirako: Abaagenze ku mukolo gw’okutikkira muwala wa Bulasiyo baavuddeyo nga batenda, anti bonna baagambye nti baanyumiddwa okufa obufi olw’ebyokunywa n’ebyokulya abagabuddwa gattako n’okusala endongo.
4Okufiirawo
Ekisoko kino kitegeeza kulafuubana oba kukola buli ekisoboka ekintu ekimu kisobole okubeerawo. Eky’okulabirako: Sseggane yasoma ebitabo kufiirawo era ebibuuzo bye ebya siniya eyoomukaaga byagenze okudda ng’afunye sikaala ya gavumenti abazadde ne basanyuka.

5Sitta nkya, ne nnindiza ggulo
Ekisoko kino kitegeeza kukola kintu mu bwangu ddala ng’omukisa guzze gy’oli. Eky’okulabirako: Naggita bwe yategeera nti waliwo ssente abazungu ze baali bagenda okuwa bamulekwa, teyatta nkya n’alinza ggulo anti yawandiisa abaana be bonna era bonna kati basomera bwereere.
6Okufa ekitiibwa
Ekisoko kino kitegeeza kuwemuka oba kuggwamu kitiibwa. Eky’okulabirako: Omukulu Bizimaana ssezaala wa Nasuuna bwe yabakyaliddeko Ssande ewedde, yagudde buli omu mu kifuba nga ne Nassuuna tamutalizza. Nassuuna yafudde ekitiibwa olw’okweraliikirira okulwala obuko.