Kitalo! Aba bbooda 2 batomereganye e Bududa ne bafiirawo!

ABAVUZI ba boda babiri , bafiiridde mu kabenje akagudde e Bududa ate omusaabaze abadde aweekeddwa, n'atwalibwa mu ddwaaliro ng'ataawa.

Akabenje kabaddewo, omu ku bavuzi ba pikipiki ng'ava Bunamubi okudda e Bukigai ng'ate omulala abadde aweeseeko omukyala, ng'ava Bukigai okudda e Bunamubi , kwe kutomeregana.

Kitegeezeddwa nti omu ku bo afiiriddewo ate omulala n'afa nga yaakatuusibwa mu ddwaaliro e Buduuda kyokka nga ye omusaabaze omukyala, ali mu ddwaaliro lya White Cross Health center ng'embeera ye mbi ddala.

Omwogezi wa poliisi e Mbale, Rogers Taitika, agambye nti emirambo gyombi, bannaabwe aba bodaboda bagibbyewo ne bagitwala ate pikipiki zombi okuli UFE 243 S bajaj boxer n'endala okutali nnamba, zikuumirwa ku poliisi e Bududa ng'okubuuliriza kugenda mu maaso.