Ab’e Lubaga batongozza pulaani ya nnyumba ku nnyumba okusaggulira Pulezidenti Museveni akalulu

BANNALUBAGA balaze pulaani nnamutayiika ey’okusaggulira Pulezidenti Museveni obuwagizi okukakasa ng’awangulira waggulu mu kalulu ka 2026.
Bano abasoba mu 400, beebamu ku baaganyulwa mu pulogulamu ya State House eya Youth Wealth Creation Program, okuva mu munisipaali ya Lubaga.
Abantu abali eyo mu 300, okuli abasiika capati, ebatunzi, abasiika emberenge n’abaala beebaganyulwa mu pulogulamu ewagirwa amaka g’Obwapulezidenti okuyita mu agavunanyizibwaako Jabe Barekye.

Ndase ng'awanise fulaaga ebasindiika mu lutabaalo

Kati bano bakungaanidde ku kisaawe kya Mengo p/s, webaasisinkanidde omukwanaganya wa pulogulamu eno, Faizal Ndase ne bamutuma yeebaze pulezidenti olw’okubakwasizaako.
Mu butongole baayanjudde pulogulamu nnamutaayika ey’okutambula ‘Nnyumba ku Nnyumba’ nga bassaggulira Museveni akalulu ne banna NRM bonna mu Lubaga okukakasa nti buli kifo mu Lubaga kibeera kya kyenvu okuviira ddala ku pulezidenti paka ku muntu asembayo ku kyalo.
Ndase, abakwaasizza fulaaga y’ekibiina ng’akabonero k’okubasindiika mu lutabaalo mu butongole era n’abakuutira nti bakulembeze enjiri y’obumu n’okulaga abantu be bagenda okusisinka ebirungi amata NRM byekoledde eggwanga lino.

Abantu nga baaniriza Ndase

Abantu bano beeronzeemu obukulembeze nga Zaina Nambejja, gwe balonze ku bwa ssentebe. Ono yayogedde ku pulaani gye balina yeeyokulaba nga Lubaga yonna efuuka ya NRM, kubanga emirundi mingi bannalubaga bazze basigalira mu kugaba ku keeki ye ggwanga olw’okubanga balonda abakulembeze abakyaamu.
Agamba nti era baakwekolamu SACCO, pulezidenti bwamala okulayira abateeremu ssente bazeewole beekulakulanye bwatyo n’akunga abantu nga January 15 2026, bakeere mu bungi balonde bbaasi.
Akulira abakyala ba NRM mu Lubaga, Hajjati Nahia Mubiru, agambye nti enkola eno bagyirinamu esusubi nti yakutuusa NRM ku buwanguzi mu Lubaga yonna.