Omwana abadde agenze okuziika embwa agudde ku mulambo gw'omusajja nga guvunze

OMWANA abadde atutte omutulumbi gw'embwa okugusuula ku ttale, agudde ku mulambo gw'omusajja , nga gutandise okuvunda .

Bibadde ku kyalo Kyanga cell e Kiboga town council mu disitulikiti y'e Kiboga , omwana Robert Kawuki  bw'agudde ku mulambo gw'omusajja , nga ku mabbali wasuuliddwawo akasimu, ‘ka mapeesa’ .

Akasimu kano Kamapeesa, kabaddeko ‘missed calls’ 73 era poliisi bw'ekubye emu ku ssimu , egenze wa mukyala we Teddy Nakamatte era n'akakasa nti oyo bbaawe ye Henry Lubwama Kisitu omutuuze w'e Kyengera.

Kigambibwa nti Kisitu, abadde akolera Kiboga ng'awaka e Kyengera, addayo ebiseera bimu.

Omwogezi wa poliisi mu Wamala, Lemark Kigozi, ategeezezza nti omwana ono, asoose kuwulira kivundu , kwe kwetegereza nga mulambo gwa musajja, n'ayita nnyina Juliet Niwandinda , naye atemezza ku ssentebe wa LC1  Constatine Ndawula, naye n'ayita poliisi.

Kigozi ayise abo bonna abamanyi omugenzi , okugenda bayambeko ku poliisi , okuzuula wa gy'abadde akolera nabo ne b’abadde akolagana nabo.