Ebinyuma mu mwoleso gwa Bride & Groom e Lugogo

OLINA omwagalwa, oli mufumbo, oli muwuulu oba onoonya, Omwoleso gw’emikolo n’embaga gaggadde ogwa Bride and Groom ogutegekebwa kkampuni ya Vision Group, guzze okukuwa ekyokuddibwaamu.
Wasigadde ennaku bbiri zokka okugutuukako anti gutandika Lwakutaano nga June 27 gukomekkerezebwe ku Ssande nga June 29 mu UMA Multipurpose Hall e Lugogo, okuyingira kugenda kubeera ku 10,000/- omuntu omu buli lunaku.
Guno mulundi gwa 16, nga omwoleso guno gutegekebwa era omwaka guno gwakutambulira ku mulamwa ogugamba nti; “Beyond I do, building a life time together’. Guteekeddwaamu ssente amakampuni gaggadde okuli; Crown Beverages, The looks Bespoke ne Bella Wine.
Akulira okutegeka ebivvulu mu kkampuni ya Vision Group Phiona Tamale, yagambye nti abantu abaneetaba mu mwoleso guno ku lunaku olusooka baakufuna omukisa gw’okuwangula ebirabo ssaako okwerabira ku bayimbi Sophie Nantongo ne Spice Diana abagenda okusanyusa abantu.
Entujjo yaakwongera okutaba Olwomukaaga bantu ab’enjawulo okuli Faaza Deogratius Kiibi, agenda okwogera ku bisaanyiizo n’enneeyisa y’omwami omutuufu mu maka.
Abalala abagenda okwogera kw’olwo ye Dr. Joseph Muhumuza, omusawo w’abakyala okuva ku Roswell Women and Children hospital, nga waakulung’amya ku mbeera z’okuzaala mu bakyala n’engeri abawala abato gye bantangaaza emikisa gyabwe mu kufuna ezzadde.
Abafumbo era bagenda kuwabulwa ku ngeri gye basobola okugulamu ebintu awamu ng’enteekateeka eno yakukulemberwamu munnamateeka Deo Kalikumutima.
Olwomukaaga era waakubaawo okuwangula ebirabo gaggadde n’omuyimbi Vinka asanyuse abantu.
Omwoleso gwakuggwalwawo mu maanyi ku Ssande, n’okwogera okwa abantu abamaanyi ssaako abayimbi abanaasanyusa abantu.
Bebe Cool ne mukyala we Zuena, be bagenda okuggulawo olunaku nga baakunyumiza olugendo lw’omukwano gwabwe, ssaako okuwabula abaagalana ku ngeri y’okukuumamu omukwano gwabwe nga gutinta buli kadde.
Abalala abagenda okwogera kw’olwo kuliko Dr. Miriam Nagujja ne Dr. Can. Ruth Ssennyonyi ssentebe wa boodi owa Uganda Aids Commission. Era mu kitundu kino bagenda kwogera ku bwesigwa n’obulambulukufu mu baagalana ssaako engeri y’okwekuumamu akawuka ka mukenenya eri abo abakalina n’abatakalina.
Olunaku olusembayo nalwo kuliko ebirabo ggaggadde ebigenda okuwangulwa okuli keeki y’embaga, essuuti y’embaga, wayini, vooca y’okugula ebintu by’awaka n’okuwangula olugendo lwa ‘honeymoon’.
Emisono gy’emikolo n’embaga egiriko gi sonsomola kw’olwo gigenda kwolesebwa mu bungi ate Jose Chameleone naye abakube omuziki mu sitayiro.
Tamale akunze abantu okujja mu bungi banyumirwe