Baleese obutambi bw'okutta Naggirinnya mu kkooti

OBUTAMBI bwa vidiyo poliisi bwe yakwata ng’abavubuka abateeberezebwa okutta Maria Nagiriinya bannyonnyola engeri gye baamulondoola okuva e Busega okutuuka we baamufunira e Lungujja ne bamutta buleeteddwa mu kkooti ne bulagibwa Omulamuzi.
Bwaleeteddwa mu kkooti omuserikale wa poliisi Alex Michael Osekeny n’annyonnyola Omulamuzi Isaac Muwata nti, oluvannyuma lw’okukwata abavunaanibwa okuli; Coporiyamu Kasolo, Johnson Lubega ne Hassan Kisekka, bakkirizza okubatwala mu bifo byonna misoni we baazikolera era ne babakwata ku butambi nga bannyonnyola ekyali mu buli kifo kye baagendamu.
Baategeezezza nti baasooka kukuhhaanira ku siteegi ya bodaboda e Nateete eya ABC ne bagenda e Busega we baalindira Nagiriinya. Emmotoka ye olwabayitako baatandika okugirondoola okutuuka ku ggeeti ye e Lungujja we baamuwambira nga bakozesa ebimundu ebijingirire n’ejjambiya.
Mu butambi Kasolo ne banne bagamba nti abagenzi Nagiriinya n’eyali ddereeva we, Ssaalongo Ronald Kitayimbwa baabavuga babatwala Mukono era baalaze n’olusaalu e Nama - Mukono we baabattira ne balekawo emirambo.
Bino nga tebinnabaawo Kasolo yasoose kussa kkooti mu kaseera akazibu bwe yasabye Omulamuzi awulira omusango guno Isaac Muwata amuwe ebitabo byonna ebyekuusa ku mateeka ga Uganda asobole okugoberera ebigenda mu maaso era abeeko ensonga z’amateeka z’abuuza ng’asinziira mu bitabo bino.
Yagambye nti ebitabo bino bigenda kumuyamba okugoberera obulungi obujulizi bwe bamuwaako kyokka looya wa Gavumenti Jonathan Muwaganya n’agamba kkooti nti mu kkomera e Luzira gye baamusibira balina buli kitabo ekikwatagana n’amateeka by’asobola okusaba.
Omulamuzi Muwata yagaanye okukkiriza okusaba kwa Kasolo n’amugamba yeeyambise ebitabo ebiri e Luzira kubanga yagaana okusasula looya amuwolereze ate n’ow’obwereere Gavumenti gw’egaba eyandibadde amuyambako mu nsonga z’amateeka naye n’amugaana.
Abaserikale ba poliisi babiri nabo baawadde obujulizi ne baleeta mu kkooti ebifaananyi bye baakuba abagenzi mu mbeera gye baabasangamu.
Mbega wa poliisi Sabasi Katanengo yagambye kkooti nti, abagenzi tebaaliko biboogerako era ye Nagiriinya yali akubiddwa nnyo ku lubba nga awanguseemu amannyo abiri aga waggulu.
Abavubuka mukaaga okuli Kasolo, Sharif Mpanga, Johnson Lubega, Nassif Kalyango, Hassan Kisekka ne Sadat Kateregga bavunaanibwa emisango okuli egy’okuwamba Nagiriinya ne Kitayimbwa n’okubatta n’obwakkondo.
Ettemu lyaliwo nga August 28 2019 e Lungujja mu Kampala.