Abaana ba Basudde bagobye nnamwandu mu nnyumba

Bya Musa Ssemwanga

NNAMWANDU w’omugenzi Herman Basudde, Aisha Nakitto Basudde, bamulekwa bamwefuulidde ne bamugoba ku nnyumba z’abadde asoloozaamu ssente ezimulabirira.

Ennyumba zino ez’emizigo zisangibwa Gaba mu Mission zooni mu munisipaali y’e Makindye.

Basudde we yafiira mu 1997, yali amaze ne Aisha emyaka 13 era nga bazadde n’abaana bana. Kigambibwa nti ng’oggyeeko abaana ba Nakitto, Basudde yalina omukyala omulala gw’alinamu abaana, ssaako abaana be yazaala mu bakazi abalala nga omugatte yalina abaana 16.

Mu bamulekwa bano mwe muli abafunvubidde ne baggya ku Aisha obuyinza obusolooza emizigo bba gye yamulekera.

Emizigo gino egiwera 10, nnamwandu agamba mw’abadde aggya eky’okulya. Bamuwaddeko omuzigo gumu ne bamugamba nti agira abeera omwo nga bwe balaba ekiddako.

‘‘Bwe nababuuzizza lwaki banzigyako obuvunaanyizibwa buno, bantegeezezza nti nabo bakuze y’essaaawa balye ku ssente za kitaabwe,’’ Nakitto bwe yategeezezza.

Yagasseeko nti ennyumba zino zaamukwasibwa omukulu w’ekika bwe baali baabya olumbe lwa Basudde n’amugamba nti mw’aba aggya ssente ezimulabirira.

Nakitto nga naye muyimbi, agamba nti olw’okweraliikirira ennyo yafuna ebirwadde era nga takyava mu ddwaaliro kyokka nga ne ssente takyalina.

Yeemulugunyizza ne ku bayimbi ab’enjawulo abazzenga bayimba ennyimba z’omugenzi naye nga ffamire tebagiwa wadde ekikumi.

Mu bano yanokoddeyo omuyimbi omu (amannya galekeddwa) era nga y’omu ku bakulira abayimbi ba Kadongokamu gw’agamba nti yamulyazaamanya ssente ze Gen. Salim Saleh ze yali yabawa ng’abayimbi ba Kadongokamu.