Ow’emyaka 5 aitsirwe omuri Ntungamo ahabw’obuteikirizana bw’omushaija n’omukazi.
Nyina w’omwana ogu na bwanyima arugira omunju yagisigamu omushaija we hamwe n’omwana bwanyima y’okurwana n’omushaija.
Kasasira nagira ngu omutumbi gukyebirwe kandi Pooriisi negira ngu obwitsi obu burugiriire aha mihondano y’omumaka.
N’ebya Omushaki weitu
NTUNGAMO
Pooriisi omu disiturikiti eya Ntungamo eriyo necondooza okufa kwa Amuron Christine ow’emyaka 5 orikugambwa kuba aitsirwe omushaija owahunguriire nyina, Felix Asiimwe bwanyima y’okugira obuteikirizana omuka.
Ekikorwa eki kibaire omu kyaro ekya Rwera omu tauni kanso ya Rwenanuura nyomwebazyo ebiro 09.10.2026.
Omugambirizi wa Pooriisi ahabw’ekyanga ekya Rwizi, Samson Kasasira nagira ngu nyakuteekateekwa hamwe na nyina w’omwana oitsirwe Tumushabe Agnes orikumanywa nka Narurungi, nibagambwa kuba bagizireho obuteikirizana obu babaire nibaruga omu baara aharwakana ebiro 08.10.2026.
Nyina w’omwana ogu na bwanyima arugira omunju yagisigamu omushaija we hamwe n’omwana bwanyima y’okurwana n’omushaija.
Omu kasheeshe k’orwakataano ebiro 09.10.2026, muriraanwa waabo omanyirwe nka Twetiise Juliet ashangire omutumbi gw’omwana aheeru y’enju etarimu bantu bwanyima y’okureeba eshagama ahabijwaro bya nyakuteekateekwaho omu kiro ky’orwakana.
Pooriisi neyoreka ngu omutumbi gw’omwana ogu gubaire gwine obuhuta aha mutwe kandi enkoni ebaire eriho eshagama erikugambwa kuba ekoresiibwe omu kwita omwana ogu eshangirwe aha mwanya ah’ekikorwa eki kibaire.
Nyakuteekateekwaho Felix Asiimwe akwatsirwe kandi obwa hati akomiirwe aha Pooriisi enkuru eya Ntungamo obwo okucondooza kurikugyenda omu maisho.
Kasasira nagira ngu omutumbi gukyebirwe kandi Pooriisi negira ngu obwitsi obu burugiriire aha mihondano y’omumaka.
#WestUpdates