Abaana 25 bahairwe omubazi gugwire, omwe yafeeraho omuri Butebo.

N’ebya Omushaki weitu

BUTEBO

Abaana 25 omu disiturikiti eya Butebo bahairwe omubazi gugwire, omwe yafeeraho kandi abandi barikurenga omuri 20 bari omu marwariro.

Ekigombe ekya Pharmaceuticals Society of Uganda (PSU) nikishaba kuhabaho okucondoza okwetongwire ahanshobi egi erikugambwa kuba ekozirwe ah’eirwariro erya Kabwangasi health center III omu disiturikiti eya Butebo.

Omu kihandiiko ky’ebiro 29.10.2026, ekigombe ekya PSU nikigira ngu abaana aba nibagambwa kuba bahairwe omubazi gw’okukoresa kuragurira ensimbo ogwa carbamazepine aha mwanya gw’okubaheereza ogw’enjoka ogwa mebendazole omuhururu y’eby’amagara.

Omubazi ogwa ‘Carbamazepine’ nigukoresibwa kuragurira abarwaire b’ensimbo kandi omubazi ogu nigubaasa kureetera abaana oburemezi gwaheza kukoresibwa kubi.

Ekigombe ekya Pharmaceuticals Society of Uganda nikigira ngu ekikorwa ekibaire omuri Butebo n’ekya kabiri kubaho omu bwire bw’ameezi 7 bwanyima y’ekikorwa nk’eki ekyabaireho omu kwezi kwa 3, 2026.

Ekigombe nikigira ngu okushobya omubazi ogu kubaasa kuba kwine akakwate n’obutagira bashaho barikumara ah’eirwariro eryo kirikworeka ngu Butebo nka za disiturikiti ezindi teyine mushaho wa disiturikiti orikujunanizibwa aha mibazi kandi aba nibakoresa omushaho owa Mbale.

Allan Ssempebwa, Omugambirizi wa minisiture y’eby’amagara nagira ngu ekikorwa ekibaireho ni kibi munonga arikworeka ngu okucondooza nikugumizamu.

#WestUpdates