Ow’ekigaari omu Central Market yashangwa afeeriire omu Rwizi- Mbarara.
Abatuura nibagira ngu n’omuntu wa kana kugwa omu mugyera gwa Rwizi omu bwire bwa wiiki emwe.
Omutumbi gwa Corneli Garamba Kyadondo aha mutwe gw'amaizi omu mugyera gwa Rwizi. Photo by Ali Wasswa.
N’ebya Omushaki Weitu
MBARARA
Enkuyanja y'abantu omu kasheeshe k’eriizooba bakyera aha mugyera Rwizi haihi n’orutindo rwa katete byanyima y’okureeba omutumbo gw’omuntu gurikuzerera aha mutwe gw’amaizi omu mugyera gwa Rwizi.
Ogu yamanywa nka Corneli Garamba Kyadondo, enzaarwa y’omu disiturikiti eya Rukungiri kandi nikigambwa ngu akabura ah’eizooba ry’orw’okubanza obu yabaire naruga aha murimo ogw’okuvuga ekigaari omu katare aka Mbarara central market.
Kuruga obwo, banywani be hamwe n’abanyabuzaare batwire nibamuronda okuhisya obu owa boda boda yaareeba omutumbi gwe omu kasheeshe k’eriizooba gurikuzerera aha mutwe gw’amaizi.
Abatuura nibateebereza okuba agwire omu mugyera gwa Rwizi arikwambuka orutindo rwa Taso village orwacwekire kandi orwatwire nakoresa kuza Nyamitanga ahi abaire natuura.
Abatuura nibagira ngu n’omuntu wa kana kugwa omu mugyera gwa Rwizi omu bwire bwa wiiki emwe.
Pooriisi yahika aha mwanya ogu nikwo kutwara omutumbi gwa Corneli Garamba omu kabafu ah’eirwariro erihango erya Mbarara.
#WestUpdates