Omwana ou muk’ishe yaarisize empitirizo 50 asiibwirwe kuruga omwirwariro.
Dr Twesigye nashoborora ngu kikabatwarira eshaaha zirikurenga omuri 6 kuza kushemeza omwana ogu kumwihamu empitirizo 50 hamwe n’obucwanyaguruka bw’obucumu.
Tiimu y'abashaho abashemiize Samuel Akamumpa, 9, ahari Mbarara Referral Hospital bakamwihamu empitirizo 50 n'obucwanyaguruka bw'obucumu. courtesy photos.
N’ebya Beth Akatukunda
MITOOMA
Samuel Akamumpa, 9, ou muk’ishe arikugambwa kuba yaarisize empitirizo asiibwirwe kuruga ah’eirwariro erya Mbarara Regional Referral Hospital.
Eki kizireho bwanyima y’abashaho kumushemeza gye bakamwihamu empitirizo 50 hamwe n’obucwanyaguruka bw’obucumu ebi bamushangire oine omunda.
Akamumpa, omwegi w’eky’okubanza ahari St Luke Primary School omu tauni kanso ya Kashenshero omu disiturikiti eya Mitooma obwa hati arimu nabagye.
Tiimu y’abashaho 8 abashemiize omwana ogu babaire beebembiirwe Dr Eden Tilahun, orikushemeza abaana kandi babaire nibareebuzibwa orikukora nka mukuru w’eirwariro eri, Dr Deus Twesigye kandi omushaho mukuru omukushemeza endwara.
Dr Twesigye nashoborora ngu kikabatwarira eshaaha zirikurenga omuri 6 kuza kushemeza omwana ogu kumwihamu empitirizo 50 hamwe n’obucwanyaguruka bw’obucumu.
Obwahati, omwana ogu ariyo nareebuzibwa tiimu y’abashaho abarikushemeza endwara z’abaana obwo abashaho barikugumizamu n’okukora ekirikubasika kureeba ngu omwana ogu yaakira.
Akamumpa atwire natuura na muk’ishe Juliet Tushabomwe bwanyima y’eishe Simon Twinomugisha okutaana na nyina kimuzaara Mellon Natuhwera obu yaabaire akiri omwerere.
Aba famire nibagira ngu Tushabomwe atwire naatuntuza omwana ogu arikumukoresa emirimo nyingi kandi abaire atarikumuheereza eby’okurya birikumara.
Bwanyima ya Akamumpa okugambiraho ishenkazi Eunice Birungi ngu nashaasha omunda, akasharamu okumutwara omuri za clinic beitu hatarikubaho empinduka yoona okuhisya obu abashaho ah’eirwariro erya Mbarara Regional Referral Hospital bamugizire ngu akore X-ray na Scan.
Bwanyima y’okukora Scan, omwana ogu akashangwa aine empitirizo omunda ezi arikugambwa kuba yagaburiirwe muk’ishe Tushabomwe.
Tushabomwe akaija yakwatwa yatwarwa omu kooti y’eidaara ry’okubanza omuri Mitooma ahabiro 08.05.2026 ahi omuramuzi Gibson Muhangi yamuteireho omushango gw’okubonabonesa omwana n’okuteeraho kumwita.
Abahababi nibagira ngu ahagati y’okwezi kwa 8 hamwe n’okwa kana, 2026 omu kyaro ekya Rweibare II omu tauni kanso ya Kashenshero akagyema Samuel Akamumpa okumira empitirizo hamwe n’obucwanyaguruka bw’obucumu.
Tushabomwe nagambwa kuba yabaire aheereza omwana ogu obushera kunywisiriza.
Omuramuzi Muhangi akasindika Tushabomwe aha rumanda okuhisya ebiro 11.06.2026 obwo okucondooza kurikugumizamu.
#WestUpdates