Bataano baitsirwe endwara y’akakonko omuri Mbarara omu meezi 6.
Abantu aba bafiire omu bwire bw’ameezi 6 ahagati y’okwezi kwa 6 n’okwa 12 omu mwaka gwa 2025.
Rogers Arinaitwe, orikujunaanizibwa aha nshonga z’abantu abarikutuura n’akakooko ka siriimu omu disiturikiti eya Mbarara. PHOTO:
N’ebya Beth Akatukunda
MBARARA
Abantu bataano nibo baitsirwe endwara y’akakonko (Tuberculosis- TB) omu disiturikiti eya Mbarara omu bwire bw’ameezi 6 ahagati y’okwezi kwa 6 n’okwa 12 omu mwaka gwa 2025.
Rogers Arinaitwe, orikujunaanizibwa aha nshonga z’abantu abarikutuura n’akakooko ka siriimu omu disiturikiti eya Mbarara nagira ngu baingi omu baafiire bakatandika okuronda obujanjabi obwire bwarengire kandi abashaho bakaba batakiine kihango eky’okukora okubatambira.
Okurugirira ahari Arinaitwe, aba bakaba baine endwara ezindi kandi bashinyire ekyamazire omubiri gwabo amaani bakafa.
Amakuru aga nigeijaho omu bwire obu Uganda eherize kwijuka ekiro ky’abarweire b’akakonko n’emiruumo eizooba rya nyomwebazyo ebiro 24.03.2026 ekikuriziibwe ahansi y’omutwe ogurikugira ngu “ buzima nitubaasa kumaraho endwara y’akakonko omu Uganda”.
Okwijuka ekiro eki kubaire omu disiturikiti eya Nwoya omu matemba g’eihanga.
Uganda eri omu mahanga 30 agarikubanza omu kugira abarweire baingi b’akakonko hamwe n’abarweire abari ahagati ya 94,000 - 96,000 abarikukwatwa endwara egi buri mwaka kandi abantu barikurenga 10,000 nibafa buri mwaka ahabw’endwara egi.
#WestUpdates