Abahereire omugyera gwa Rwizi kutunga emiti ya busha

Abahereire omugyera gwa Rwizi kutunga emiti ya busha

N’ebya Michael Tumwakiire

Minisiture y’amaizi n’eby’obuhangwa batandikireho omusiri gw’okukuza emiti ei baraabe nibaihamu ensigo ezi baraabe nibaheereza abatuura ahabwa busha.

Eki nikiijaho bwanyima y’abatuura abari haihi n’omugyera gwa Rwizi omururembo rwa Mbatrara kuguma nibetomboitwa ahabw’okuguma nibashashura sente barikugura emiti y’okubyara omurubaju rw’omugyera bagumize ngu obumwe emiti egi t’erikumera.

Habaireho n'okwegyesibwa ahamigasho y'okubyara emiti nk'ogw'omugano haihi n'emigyera. PHOTO: MICHEAL TUMWAKIIRE

Omusiri gw’emiti ogu gutongoziibweho ab’ekitongore ky’amaizi n’obuhangwa bakwataniise n’eitendekyero erya Bishop Stuart University n’ekindi kigyendererwa ky’okuhwera abeegi abarikushoma eby’obuhingi n’obuhangwa kwongyera ahabukugu. 

Aba kandi hoona bongyeire baayegyesibwa ahakuhinga emiti y’emigano omurubaju rw’emigyera hamwe n’omugasho oguri omukuhinga oku oteiremu n’okutunga entaasya

Aba bagizireho n’empaka z’okuhaajaana ahabw’amatendekyero nka za yunivasite hamwe n’amashomero ga siniya obwo barikuhaajaana ahamiringo y’okurinda eby’obuhangwa. Empaka za siniya zisingirwe Mbarara High School kandi ez’amatendekyero zisingirwe Mbarara University of Science and Technology.

Ekitongore ky’amaizi n’obuhangwa nikigumizamu omuhururu y’okushomesa abatuura ahaku baakubaasa kurinda eby’obuhangwa omu wiiki  egi ei beetsire Uganda Water Week egyendereire okweteguurira okujaguza ekiro ky’amaizi omusi yoona omukwezi oku.

#WestUpdates