Abakozi ahari Igara Growers Tea factory limited, Bushenyi besharingire ahabw’obutashashurwa.

N’ebya Bruno Mugizi

BUSHENYI

Emirimo aha fakitore y’amajaani eya Igara Growers Tea factory limited omu disiturikiti eya Bushenyi eshanyariire bwanyima y’abakozi kwesharinga ahabw’obutashashurwa omushaara gwabo gw’ameezi 4.

Enshonga egi eteganiise enkumi n’enkumi z’abahingi b'amajaani abarikubisibwaho esente ezibarikwiha aha fakitore egi 

Abakozi aha fakitore egi erikushangwa omu tauni kanso ya Kyamuhunga nyomwabazyo ebiro 16.03.2026 bakwatsize ahansi ebikwato byabo ekireteire emirimo aha fakitore egi yashanyarara ekiretsireho okutiina ngu kibaasa kuteganisa bizinesi y’amajaani omu kyanga eki.

Abakozi aba nibagira ngu batwire batarikutunga omushaara gwabo kuruga okwezi kwa 11, 2025 ekireteire baingi omuri bo baremwa kushashura esente z’okupangisa (rent), okushashura looni ezibiine omu bank hamwe n’okuremwa kwehisyabo ebyetengo byabo.

Aba nabwo nibajunana abarikwebembera fakitore egi ahabw’obutabashashurira esente zaabo omu NSSF kuruga 2022.

Orikukurira enshonga z’abakozi omu disiturikiti eya Bushenyi, Loyce Atukwasa nagira ngu ofiisi ye egizireho orukiiko ahagati y'bakozi hamwe n’abarikwebembera Igara Growers Tea Factory Limited beitu tihaine mubazi gwona ogubarondiire enshonga ezi.

Ahitugire kuhandiikira amakuru aga, tugyerizeho kugamba n’abarikwebembera fakitore egi ahabirikubagambwaho kwonka byaba ebya busha.

#WestUpdates