Omupangisa n’omwe aha bakwateirwe okwitwa kw’omushuubuzi omuri Bushenyi.

N’ebya Bruno Mugizi

BUSHENYI

Pooriisi omu disiturikiti eya Bushenyi ekwatsire abantu bana abarimu n’omupangisa ahabw’okugambwa kuba baine akakwate n’okwitwa kw’omushuubuzi rurangaanwa kandi owabaireho mukuru w’eby’esente ahabwa disiturikiti eya Bushenyi.

Omugyenzi amanyirwe nka; Abias Asiimwe Baryayanga, 58, omutuura w’omu kyaro ekya Kyandango omu woodi ya Kashenyi omuri Ishaka Division omu munisiparite ya Bushenyi-Ishaka ashangirwe afiire nyomwabazyo ebiro 19.04.2026.

Okurugirira aha beeka ye, Baryayanga aheererukire kureebwa ebiro 18.04.2026 shaaha nka 12:30 z’omwabazyo omu tauni ya Kashenyi ahi abaire apaakingire emotoka ye atakabuzire.

Nelson Atwine, mwine-nyina w’omugyenzi nagira ngu abeeka bakwatsirweho bwanyima y’omukazi w’omugyenzi kubagambira ngu omushaija we tagarukire omuka.

“Tutungire okumanyisibwa ngu Baryayanga agyenzire omu mwabazyo kandi ngu tagarukire. Aho niho tutandikire kumuronda okuhisya obututungire amakuru mabi g’okufa kwe,” Atwine arikushoborora.

Omutumbi gwe gushangirwe gusherekire omuntandaruuha (ceiling).

Omugambirizi wa Pooriisi ahabw’ekyanga ekya Bushenyi empango, Apollo Tayebwa yahamya okukwatwa kw’abantu bana beitu nagira ngu ebirikukwata aha barikuteekateekwaho tibirikuza kushohozibwa ahabw’obutenda kuteganisa okucondooza.

Obwa hati, bakomiirwe ahari Bushenyi Central Police Station obwo okucondooza kurikugumizamu.

Tayebwa nayongyeraho ngu okucondooza okwahikireho nikworeka ngu omutumbi gwe gubaire gutematemire, gwokize kandi gusherekire omu “ceiling” omu kyombeko ky’okupangisa omuri Kashenyi trading Centre.

Pooriisi negira ngu omwe omu barikuteekateekwaho orikugambwa kuba ari omupangisa omu kyombeko ekyo ashangirwe ayesherekire omu “ceiling” ahi omutumbi nagwo gubaire guri.

Tayebwa nagira ngu Pooriisi ehikireho bwanyima y’abatuura kuteeraho kwenda kwita orikuteekateekwaho.

“Tukozire omwika gw’okuriza amaisho hamwe n’amasasi g’omu mwanya kubaasa kutatanisa abantu ababaire beerundaine nikwo kucungura nyakuteekateekwaho obuteitwe ekikunga musisa ky’abantu,” Tayebwa arikushoborora.

#WestUpdates