Abaishiki abari omu siniya nibashabwa okwejumbira omu mashomo ga sayansi.
Reuben Twinomujuni nagira ngu abaana b’abaishiki abarikushaba amashomo ga sayansi ahari za University bakiri ahansi wagyeragyeranisa n’aboojo kandi omubaro ogu gwizire nigukyendeera omu myaka ehingwire.
Reuben Twinomujuni, Omugambirizi w’eitendekyero erya Kyambogo University arikugambaho n'abanyamakuru ah'eitaagi rya University egi omuri Bushenyi aharwamukaaga ebiro 21.03.2026. PHOTO: Beth Akatukunda
N’ebya Beth Akatukunda
BUSHENYI
Abahangu omu by’obwegyese nibashaba abaishiki abari omu mashomero ga siniya okuta amaani aha mashomo ga sayansi n’okwetantara okuteekateeka ngu amashomo aga nigatwarwa aboojo bonka.
Okushaba oku kuhairweyo Reuben Twinomujuni, Omugambirizi w’eitendekyero erya Kyambogo University, obu abaire nabuganaho abeegi b’abaishiki barikurenga 1,000 aberundaaniire ahari Kyambogo University ahabw’eitaagi erya Burengyerwa-Izooba omuri Katungu omu disiturikiti eya Bushenyi.
Omukoro ogu guhikirweho abaana b’abaishiki kuruga omu mashomero gatari gamwe na gamwe aga siniya ag’omu kyanga kya Ankole kandi gubaireho Orwamukaaga ebiro 21.03.2026.
Okurugirira ahari Twinomujuni, abaana b’abaishiki abarikushaba amashomo ga sayansi ahari za University bakiri ahansi wagyeragyeranisa n’aboojo kandi omubaro ogu gwizire nigukyendeera omu myaka ehingwire.
Bamwe omu beegi b'abaishiki kuruga omu mashomero ga siniya ag'omu kyanga ekya Ankole abahikire aha mukoro gwa Career guidance ogutebeekanisiibwe Kyambogo University ah'eitaagi rya University egi omuri Katungu, Bushenyi aharwamukaaga ebiro 21.03.2026.
Nagira ngu egi niyo nshonga ahabw’enki Kyambogo university eteireho entebeekanisa egi okureeba ngu abeegi b’abaishiki okwetorora eihanga bayejumbira omu kutwara amashomo ga sayansi.
Twinomujuni hoona agizire ngu hariho nenyikiriza ezigwire ngu amashomo ga sayansi nigatwarwa abaana b’aboojo arikukyoreka ngu eki kigarwire enyima abaishiki okushoma amashomo aga, omuze ogu arikugira ngu gushemereire okurekwa n’okwetantarwa.
Abaishiki kuruga omu mashomero ga siniya ag'omu kyanga ekya Ankole abahikire ahamukoro gwa Career guidance ogutebeekanisiibwe Kyambogo University ah'eitaagi ryabo eririkushangwa omuri Katungu omu disiturikiti eya Bushenyi.
Aha mukoro nigwo gumwe, Dr. Savannah Nuwagaba- Omushomesa ahari Kyambogo University nashaba abazaire okukwatanisa n’abashomesa okuhwera abaana baabo ah’amashomo agu bashemereire okushoma agarikwija kubabeera ag’omugasho omubiro bya nyensya.
Akantambira Caleb, mukuru w’abeegi ahari Kyambogo university ahabw’eitaagi erya Burengyerwa-Izooba nawe ashabire abazaire okureka kugyema abaana amashomo agu barikwenda bo nk’abantu kutari okubaasa kw’abaana baabo.
#WestUpdates