Aakiibishopu Kaziimba ajumiriire ba ‘manager’ abarikuharahaza abakozi omu by’omubonano.

N’ebya Beth Akatukunda

KAMPALA

Aakiibishopu w’ekanisa ya Uganda, the Most Rev, Dr Samuel Stephen Kaziimba Mugalu nayenda ba ‘managers’ omu myanya y’okukoreramu okuta maani aha kurwanisa okuharahaza abakozi omu nshonga z’eby’omubonano omu myanya ei barikwebembera.

Aakiibishopu nagira ngu okuharahaza abakozi n’abandi bantu omu nshonga z’omubonano nikishiisha eiziina ry’ebitongore n’ekitiinisa ky’omuntu orikuba akozire ekikorwa ekyo.

Dr Kaziimba nashoborora ngu hariho abashaija abaine ofiisi z’amaani abarikuharahaza abakazi omu by’omubonano obwo barikubaraganisa kubongyeza omushaara n’okubakuza aha mirimo, eki arikugira ngu n’ekikorwa kibi munonga kandi kiine kurekyerwaho.

Aakiibishopu Kaziimba nabwo nayehanangiriza abakazi obutoosha okujwara kurungi aha mirimo yaabo barekye kushendashenda abashaija n’okubata omukohibwa.

Okucondooza okukozirwe omu bitongore bitari bimwe nikworeka ngu abakazi abari ahagati ya 58% na 86% baraharaharaziibwe omunshonga z’omubonano obwo barikuteganisibwa bakama baabo aha mirimo.

#WestUpdates