Administrator General Manzi atoorainwe kuba narebeerera ebintu by’omugyenzi Garuga.

N’ebya Omushaki weitu

KAMPALA

Kooti enkuru y’enshonga z’amaka omuri Kampala etooraine Administrator General, Victor Manzi okuba niwe yaaba najunaanizibwa aha bintu by’omugyenzi James Garuga Musinguzi, owabaire ari omushubuuzi ruranganwa ahabw’akanya bwanya.

Eki kizireho bwanyima y'obuteikirizana kubarukaho omu famire y’omugyenzi James Garuga Musinguzi.

Omuramuzi John Eudes Keitirima ahaire encwamu aharwakataano arikubinga okushaba kwa mutabani wa Garuga, Alwyn Musinguzi obaire nayenda ngu abe niwe yarebeerera ebintu by’ishe n’abandi ba memba ba famire.

James Garuga Musinguzi akaitwa endwara y’ekookoro omu kwezi kwa 8, 2025 kandi akasigaho eby’obugaiga byingi, efakaazi hamwe n’abaana 4.

Omu ncwamu ye, Omuramuzi Keitirima nakyoreka ngu obuteikirizana n'okutungana obukumu, tikirikubasika aba famire y’omugyenzi Garuga okukorera hamwe omu busingye.

Omuramuzi nagira ngu okuheereza famire obushoborozi bw’okurebeerera ebintu kibaasa kwongyera kureetaho obuteikirizana.

Administrator General, Victor Manzi hati niwe arikwija kuba najunaanizibwa aha bintu by’omugyenzi James Garuga Musinguzi okuhisya obu kooti eragonjoore enshonga z’aba famire ya Garuga.

#WestUpdates