Abayimbi ba Ganda Boys batandise kaweefube w’okulinnyisa omutindo gw’emmwaanyi e Buikwe

Bya Emmanuel Balukusa

ABAYIMBI okuli; Denis Mugaga ssaako Dan Ssewagudde abeeyita ba Ganda boys batandise kaweefube  w’okutumbula omutindo gw’emmwaanyi.

Bano era bagenda  kuyamba abalimi b’emmwaanyi  mu disitulikiti y’e Buikwe wamu n’okukyusa embeera zaabwe.

Bano nga bayita mu kibiina kyabwe ekya Ganda Foundation mu kaweefube waabwe begattiddwaako abakulenbeze mu disitulikiti eno okuli ssentebe wa disitulikiti eno Jimmy Kanaabi, omubaka wa Buikwe south mu palamenti Dr. Lulume Bayiga ssaako n’eyali omubaka omukyala owa disitulikiti y’e Buikwe Dorothy Christine Mpiima era  ng’ono ye ambasadda w’ekitongole kyabwe.

Bano basoose kusisinkana abalimi b'emmwaanyi mu ggombolola y’e Buikwe abeegattira mu kibiina kya Buikwe Coffee Farmers Cooperative Society era Mpiima abasabye okukozesa ekibiina kino okwewa amagezi wamu n’okukozesa ekibiina kyabwe okwekulaakulanya ssaako n’okwongera ku mutindo gw’emmwaanyi zaabwe.

Ye omubaka Lulume Bayiga, asuubizza okubafunira endokwa z’emmwaanyi ez’omulembe mu sizooni eddako ate ye ssentebe wa disitulikiti, Jimmy Kanaabi asiimye ba Ganda Boys olw’okulowooza ku Bannabuikwe ssaako n’okusoosowaza emmwaanyi gy’agamba nga bw’eri ku ttunzi.

Denis Mugaga ku lwa Ganda Foundation ategeezeza ng’ emmwaanyi bweri ku katale era ng’ono awadde abalimi b’emmwaanyi obukadde busatu okubayambako mu kutumbula ennima y’emmwaanyi ey’omulembe mu kitundu kyabwe.

Mugaga ategezeza nga kaawa w’emmwanyi bwali ku ttunzi mu mawanga g’Abazungu era ngono abasuubiza okubafunira akatale k’emmwaanyi zaabwe ssaako ne Kaawa mu Bazungu.

Edward Musisi omu ku balimi asiimye olw’okubadduukirira era ategeezezza nga bwe balina ekigendererwa ky’okutumbula embeera z’abalimi ssaako n’okukulaakulanya ekitundu kyabwe nga bayita mu kulima.