Abantu 60 balondeddwa okugenda e Bungereza okuyimba ‘Ekitiibwa kya Buganda

OMULANGIRA David Namugala Mawanda ayozaayozezza abawanguzi b’empaka z’okuyimba Ekitiibwa kya Buganda, 60 abaasunsuddwa n’abakubiriza okweyisa obulungi nga batuuse e Bungereza. Ono bino okubyogera yabadde mu maka ge e Salaama ne yeebaza ba ‘Ganda Boys’ Daniel Ssewagudde ne Denis Mugagga olw’ekisuubizo kye baakola nga June 28, 2023 era ne bakitambuza okutuuka lwe bakituukirizza.

Omulangira Namugala ng’alambika

Yasiimye kkampuni ya Vision Group etwala Bukedde ttivvi ne Bukedde olupapula olw’okwewaayo ne bayimirira ne ba ‘Ganda Boys’ okutumbula Ekitiibwa kya Buganda mu ggwanga ne mu nsi yonna. Era yeebazizza n’omubaka wa Bungereza mu Uganda, Amb. Kate Airey, wamu n’Obwakabaka bwa Bungereza olw’okuwaayo Royal Albert Hall mu London emikolo gye gigenda okubeera.

Grace Bayiga owa Bukedde ng’a-buuza ku Mulangira Namugala

Ba ‘Ganda Boys’ baakulisizza abaayiseemu okugenda okuyimba empaka ez’akamalirizo era ne beebaza enkumi n’enkumi z’abantu abaazeetabamu abaawaayo obudde bwabwe n’ensimbi.

Baategeezezza nti abaasunsuddwaamu bagenda kukiikirira bonna abaayimba Ekitiibwa kya Buganda. Abaasunsuddwa baakugenda e Bungereza okukwata oluyimba luno ku ntambi mu Abby Studio mu kibuga London ekya Bungereza.

Ba Ganda Boys Denis Mugagga (ku kkono) ne Daniel Ssewagudde (ku ddyo) nga bali n’aba Akapera Shalom abamu ku baasunsuddwa

Abaasunsuddwa okugenda