'Mujje mutwegatteko mwolese eby'abagole mu Bride and Groom '
Sep 01, 2021
OMWOLESO gw’ebyabagole ogw’omwaka guno ogumanyiddwa nga Bride and Groom ogutegekebwa Vision Group gutongezeddwa leero ku kitebe kya Vision Group mu Industrial Area.
'Mujje mutwegatteko mwolese eby'abagole mu Bride and Groom '
Omwoleso guno gwa mulundi gwa 12 era nga gwe gusookedde ddala okubeera ogw’okumutimbagano. Guno gwakulagibwa ku mikutu gya Vision Group gyonna omuli ttivvi n’emitimbagano gya kkampuni.
Gawuni za bagole ez'omulembe okuva mu Bridal World
Gervase Ndyanabo, amyuka akulira ekitongole yategeezezza nti omwoleso gwakulagibwanga ku wiikendi kwokka ku buli ttivvi ya Vision Group omuli Bukedde TV1 ne 2, Urban, Tv West, Wan Luo n’endala.
Gwakutandika nga September 11 omwaka guno olwo gukomekkerezebwe nga October 3,2021. Gujja kulagibwa ku ku ssaawa 8:00 ez’omu ttuntu okutuuka ku ssaawa 10:00 ez’olweggulo ku Lwomukaaga olwo ku Ssande gulagibwenga okuva ku ssaawa 9:00 ez’olweggulo okutuusa 11:00 akawungeezi.
Ndyanabo ng'ayogera
Ndyanabo yannyonnyodde nti omwoleso gwa ku mutimbagano olw’ekirwadde kya Covid 19 wabula kino abantu balina okukikozesa ng’omukisa okwongera ku bumanyi bwe balina kuba embaga tezijjakuggwaayo okuggyako ennamba y’abantu okukendeera.
Ate omukung’aanya wa Vision Group ow’oku ntikko Barbra Kaija yategeezezza nti abantu basaanye okwettanira omwoleso guno kuba wadde tuli mu biseera bya Covid 19, abantu tebajja kukoma kukola mikolo ate n’abagole tebajja kukoma kunoonya birungi ye nsonga lwaki omwoleso gutegekeddwa ku mutimbagano.
Ttiimu evunaanyizibwa ku mwoleso guno
Abagenda okwolesa bakulembeddwa Amelia Kyambadde owa Bridal World nga bano bakafulu mu kwambaza abagole abakyala, abaana n’abaami ssaako kalonda yenna akwatagana ku bagole.
Kkeek ey'omulembe okuva mu Sarah's Cakes
‘’Ebintu ebisinga kati bitambulira ku mutimbagano n’olwekyo nkoowoola bannange bonna gye bali okwetaba mu mwoleso guno basobole okukoppa amagezi ku butya bwe tusobola okuyita mu mbeera ya Covid 19 ate ne tusigala nga tukola.’’Kyambadde bwe yategeezezza.
Omwoleso guno era guteereddwaamu ensimbi aba Bridal World, Sarah’s Cakes n’aba Image Impressions
No Comment