Yunivaasite y’e Makerere etenderezza omulimu ogukolebwa bannamawulire mu ggwanga okumanyisa abantu ku mawulire agakwata ku kutaasa obutonde bw’ensi, ekiyambye bannayuganda okumanyisibwa ku butya bwe bayinza okuyambako okubukuuma.

Bino bibadde ku mukolo ogw’okwefumiitiriza ku ddembe lya bannamawulire mu nsi yonna, nga guyindidde ku yunivaasite, nga gutambulidde ku mulamwa gw’okwefumiitiriza ku bikolebwa bannamawulire mu kiseera ng’obutonde bw’ensi busaanyizibwawo.

Polof Henry Arinaitwe, eyakiikiridde omumyuka wa cansala, yategeezezza nti bannamawulire bakolera mu bugubi, nga bangi bafiira ku mirimu gyabwe nga bafuba okuwa bannansi ebigenda mu maaso, n’olwekyo balina okusiimibwa.

Ku mukolo gwe gumu, ekitongole kya Twaweza Uganda kifulumizza alipoota eraze nti bannayuganda bangi bakwatibwako ku buttoned bw’ensi obusaanawo era bangi baagala okubaako kye bakola, kyokka bateekeddwa okwongera okusomesebwa ku biki bye balina okukola.

Wafula Oguttu, omu ku bannamawulire abakuukuutivu yennyamidde olw’engeri abantu gye basaanyaawo obutonde bw’ensi nga beekwasa obwavu, n’asaba kino kikome kubanga edda obutonde bwaliwo nga n’obwavu weebuli. Yasabye gavumenti okubaako ky’ekola okutaasa emiti egitemebwa, waakiri abantu babasalire ku masannyalaze ne ggaasi.

Ye Gerald Tenywa, munnamawulire wa Vision Group era omukuukuutivu mu kuwandiika amawulire agakwata ku butonde bw’ensi y’asabye bannamawulire okwongera okuyiga ebikwata ku butonde, basobole okuwandiika bye beekakasa baleme okuwabya abantu.

Tenywa era yasiimiddwa olw’omulimu gw’akoze mu kumanyisa abantu ebikwata ku kusaanyaawo obutonde, kyokka ne yennyamira nti bannamawulire nga ye batono abawandiikira mu kisaawe kino, kwe kusaba bangi bamwegatteko ensi esobole okutaasibwa.